ఎల్బీనగర్, మే 16 : అంతర్జాతీయ రోలర్ స్కేటింగ్ పోటీలకు మన్సూరాబాద్ విద్యార్థిని ఎంపికైంది. మన్సూరాబాద్ డివిజన్‌కు చెందిన టంగటూరి నందిత ఇన్‌న్లున్ హాకీ సీనియర్ ఉమెన్స్ కేటగిరిలో ఇండియా జట్టుకు ఎంపికైంది. అంతర్జాతీయస్థాయిలో నిర్వహించనున్న రోలర్ స్కేటింగ్ పోటీలు ఇటలీలో నిర్వహించనున్నారు. ఈ పోటీలకు ఎంపికైన ఇండియా జట్టుకు నందిత ఎంపికైంది. ఈ మేరకు నందిత తండ్రి నాగరాజుతో కలిసి శుక్రవారం ఎల్బీనగర్ ఎమ్మెల్యే సుధీర్‌రెడ్డిని కలిశారు.

ఈ సందర్భంగా నందితను ఎమ్మెల్యే అభినందిస్తూ అంతర్జాతీయ పోటీల్లో సత్తాచాటాల ని సూచించారు. అనంతరం ఆయన మాట్లాడుతూ.. రెండేండ్ల క్రితం వనస్థలిపురం డివిజన్‌లో ఉన్నత ప్రమాణాలతో రోలర్ స్కేటింగ్ రింగ్ గ్రౌండ్ నిర్మించినట్లు తెలిపారు. క్రీడాకారులకు తన సహకారం ఎల్లప్పుడు ఉంటుందని హామీ ఇచ్చారు. తాను కూడా వనస్థలిపురంలోని గ్రౌండ్‌లో శిక్షణ తీసుకున్నట్లు క్రీడాకారిణి నందిత ఎమ్మెల్యేకు వివరించింది. క్రీడాకారులను తీర్చిదిద్దుతున్న రోలర్ స్కేటింగ్ రాష్ట్ర అసోసియేషన్ సభ్యులు, కోచ్ శ్రీనివాస్, సత్యం ఇతరులను ఎమ్మెల్యే సుధీర్‌రెడ్డి అభినందించారు.