బెంగళూరు: భార్యను హత్య చేసి, ఆమె మృతదేహాన్ని సూట్‌కేస్‌లో కుక్కి, పూణేకు పారిపోయిన వ్యక్తిని బెంగళూరు పోలీసులు అరెస్టు చేశారు. మహారాష్ట్రకు చెందిన రాకేష్‌గా గుర్తించబడిన నిందితుడిని కాల్ డిటైల్ రికార్డ్స్ (Call Detail Record ) ఉపయోగించి ట్రాక్ చేసి, సతారా పోలీసులు అదుపులోకి తీసుకున్నారు. సతారాలోని పర్గావ్ ఖండాలాలో స్థానికులు రాకేష్ కారు లోపల అపస్మారక స్థితిలో ఉన్నట్లు గుర్తించారని పోలీసులు తెలిపారు. రాకేష్ విషం లాంటి పదార్థాన్ని సేవించాడని, వెంటనే ఆసుపత్రిలో చేర్పించాడని పోలీసులు తెలిపారు. ప్రస్తుతం అతను చికిత్స పొందుతున్నాడు.

హులిమావు సమీపంలోని ఒక ఇంట్లో సూట్‌కేస్‌లో ఒక మహిళ మృతదేహం లభ్యం కావడం బెంగళూరు అంతటా సంచలనం సృష్టించింది. మృతురాలిని 32 ఏళ్ల గౌరీ అనిల్ సాంబేకర్‌ గా గుర్తించారు. రాకేష్ సాంబేకర్ గౌరీ తల్లిదండ్రులను సంప్రదించి ఫోన్ కాల్ ద్వారా నేరం అంగీకరించాడని నివేదికలు తెలిపాయి. మహారాష్ట్ర పోలీసుల నుండి దీనిపై సమాచారం అందిన తరువాత, స్థానిక పోలీసులు సంఘటనా స్థలానికి చేరుకుని దర్యాప్తు ప్రారంభించారు. ఈ జంట రెండేళ్ల క్రితం వివాహం చేసుకున్నారని అధికారులు తెలిపారు. వారు మహారాష్ట్రకు చెందినవారు. రెండు నెలల క్రితం పని కోసం బెంగళూరుకు వెళ్లారు. నిందితుడు ఒక ఐటీ కంపెనీలో ప్రాజెక్ట్ మేనేజర్‌గా పనిచేస్తున్నాడు. ఆమె గృహిణి,  ఉద్యోగం కోసం వెతుకుతోందని పోలీసులు వెల్లడించారు.