రూ.20 లక్షల ఆస్తి నష్టం

మలక్‌పేట, నవంబర్ 19: మలక్‌పేటలోని ఓ పేపర్ కప్పుల గోడౌన్‌లో భారీ అగ్ని ప్రమాదం చోటుచేసుకుంది. ఈ ఘటనలో దాదాపు రూ.20 లక్షల విలువ చేసే పేపర్ కప్పులు పూర్తిగా దగ్ధమయ్యాయి. పోలీసులు, బాధితులు తెలిపిన ప్రకారం చాదర్‌ఘాట్ పోలీస్‌స్టేషన్ పరిధిలోని మలక్‌పేట మహబూబ్ మాన్షన్ మార్కెట్‌లో 392 షాపులో ప్రైమ్ ఎంటర్‌ప్రైజెస్ పేరుతో పేపర్ కప్పుల దుకాణం, గోడౌన్‌ను రాజేశ్ ఖాబ్రా నిర్వహిస్తున్నాడు.

మంగళవారం తెల్లవారుజామున గోడౌన్ షట్టర్ ముందు ఉన్న చెత్తలో గుర్తు తెలియని వ్యక్తులు సిగరెట్ వేయడంతో మంటలు చెలరేగి షట్టర్ లోపలికి వ్యాపించాయి. మంటలకు పేపర్ కప్పులు పూర్తిగా దగ్ధమయ్యాయి. ఈ ఘటనలో దాదాపు రూ.20 లక్షల నష్టం వాటిల్లింది. మలక్‌పేట ఫైర్ స్టేషన్ సిబ్బంది మంటలను అదుపు చేశారు. ప్రమాద స్థలాన్ని మార్కెట్ కమిటీ చైర్‌పర్సన్ చెకోలేకార్ లక్ష్మీ పరిశీలించారు. ఆమె వెంట ఎస్‌జీఎస్ దామోదర్, చిలుక నర్సింహ్మారెడ్డి, డైరెక్టర్లు ఉన్నారు.