1. ఇప్పుడొచ్చి విమర్శలా?
2. కేసీఆర్‌పై ఆది శ్రీనివాస్ ధ్వజం

హైదరాబాద్, జనవరి 31 (విజయక్రాంతి): ఇన్ని రోజులు కుంభకర్ణుడిలా ఫామ్‌హౌస్‌లో పడుకున్న కేసీఆర్.. ఇప్పుడొచ్చి విమర్శలు చేయడమేంటని ప్రభుత్వ విప్ ఆది శ్రీనివాస్ విమర్శించారు. శుక్రవారం గాంధీభవన్‌లో ఆయన కేసీఆర్‌పై విమర్శలు గుప్పించారు. పంచాయతీ ఎన్నికల నేపథ్యంలో ఫామ్‌హౌస్ నుంచి బయటకొస్తానని కేసీఆర్ అంటున్నారని అన్నారు.

మహేశ్‌బాబు డైలాగ్ లాగా సీఎం రేవంత్ రెడ్డి దెబ్బకు కేసీఆర్ మైండ్ బ్లాక్ అయి ఫామ్ హౌస్‌కు పరిమితమయ్యాడన్నారు. రాష్ట్రంలో ప్రజలు తిరస్కరించినా ప్రతిపక్ష పాత్ర పోషించమని ప్రజలు అవకాశం ఇచ్చారని కానీ అందుకు కూడా ఆయనకు చేత కాలేదన్నారు. కైలాసంలో పెద్ద పాములాగా ధనిక రాష్ట్రాన్ని అప్పులకుప్పగా మార్చారని వాపోయారు.  బసవేశ్వర, సంగమేశ్వర గురించి మాట్లాడుతున్న కేసీఆర్.. కాళేశ్వరంపై ఎందుకు మాట్లాడటం లేదన్నారు.