హైదరాబాద్: బీఆర్ఎస్ అధికారంలోకి వచ్చిన తరువాత కంచె గచ్చిబౌలిలోని 400 ఎకరాల సెంట్రల్ యూనివర్సిటీ భూములను(Central University lands) బరాబర్ వాపస్ తీసుకుంటామని బీఆర్ఎస్ వర్కింగ్ ప్రెసిడెంట్ కేటీఆర్(Kalvakuntla Taraka Rama Rao) తెలంగాణ భవన్ లో నిర్వహించిన మీడియా సమావేశంలో స్పష్టం చేశారు. ఈ సంద్భంగా కేటీఆర్ మాట్లాడుతూ... హైదరాబాద్ సెంట్రల్ యూనివర్సిటీలో విద్యార్థులు చేస్తున్న పోరాటానికి, వారి పోరాట స్ఫూర్తికి బీఆర్ఎస్ పార్టీ తరఫున, హైదరాబాద్ నగర ప్రజల తరఫున హృదయపూర్వక సెల్యూట్ అన్నారు. హెచ్‌సీయూ విద్యార్థులది అసామాన్య పోరాటమని కేటీఆర్ పేర్కొన్నారు. తెలంగాణ ఉద్యమంలో ఉస్మానియా, కాకతీయ, శాతవాహన యూనివర్సిటీలో జరిగిన పోరాటాలకు ధీటుగా సెంట్రల్ యూనివర్సిటీ విద్యార్థులు రాష్ట్ర ప్రభుత్వాన్ని సవాల్ చేస్తూ వీరోచితంగా పోరాడుతున్నారని ఆయన హర్షం వ్యక్తం చేశారు. 

పది రోజులుగా విద్యార్థులు పోరాడుతుంటే.. కనీసం వారితో చర్చలు జరపడానికి కూడా ఈ ప్రభుత్వం ముందుకు రావడం లేదని మండిపడ్డారు. ఆందోళన చేస్తున్న విద్యార్థులను గుంటనక్కలు, పెయిడ్ బ్యాచ్ అనడం ముఖ్యమంత్రి, మంత్రుల అహంకారానికి నిదర్శనమన్నారు. అక్కడ జంతువులే లేవు. అవన్నీ ఆర్టిఫిషియల్ ఇంటెలిజెన్స్ ఇమేజెస్ అని భట్టి విక్రమార్క తన కృత్రిమ మేధను బయట పెట్టుకున్నారని చురకలంటించారు. ముఖ్యమంత్రి రాష్ట్రానికి నియంతో ,బాసో కాదు. ఓ పెద్ద పాలేరు మాత్రమేనని కేటీఆర్ స్పష్టం చేశారు.  మంత్రులైనా.. ఎమ్మెల్యేలైనా.. ఎమ్మెల్సీలైనా.. అందరూ పబ్లిక్ సర్వెంట్స్. ప్రజా సేవకులు మాత్రమేనని గుర్తుచేశారు. కాంగ్రెస్ ప్రభుత్వం చెప్పుకుంటున్న ప్రజా పాలనలో ప్రజాస్వామిక స్ఫూర్తి అనువంతైనా లేదని విమర్శించారు. మేం పాలకులం.. మీరందరూ మా కాలికింద చెప్పులు, బానిసలు అన్నట్టుగా ఒక విచిత్రమైన మానసిక రోగంతో రేవంత్ రెడ్డి ప్రభుత్వం వ్యవహరిస్తుందని ఆగ్రహం వ్యక్తం చేశారు.

ప్రజల సొమ్ముకు ప్రభుత్వాలు ధర్మకర్తలు మాత్రమేనని తెలిపారు. రోజుకు 18 గంటలు పని చేస్తా అని చెప్పుకునే రేవంత్ రెడ్డి కనీసం పది నిమిషాలు మనిషిలాగా ఆలోచించాలని కేటీఆర్ కోరారు. రియల్ ఎస్టేట్ బ్రోకర్ లాగా రోజుకు 18 గంటలు పని చేయకుండా ఒక పది నిమిషాలు ఒక తండ్రి లాగా, ఒక తాత లాగా భవిష్యత్ తరాల మీద సోయితోని ఆలోచించాలని డిమాండ్ చేశారు. ప్రభుత్వ భూమి అని చెప్పుకుంటున్న కాంగ్రెస్ నేతలు అర్ధరాత్రి దొంగలు లాగా అక్కడ పనులు ఎందుకు చేయిస్తున్నారు? పది రోజులు సమయం ఇవ్వండని కోర్టుకు చెప్పిన కాంగ్రెస్ ప్రభుత్వం దొంగల్లాగా ఎందుకు అక్కడ చెట్లు కొట్టేస్తూ వన్యప్రాణులను చంపేస్తోందన్నారు. కోర్టు సెలవులను చూసుకొని సెంట్రల్ యూనివర్సిటీలో ప్రభుత్వం విధ్వంసం సృష్టిస్తుందని ఫైర్ అయ్యారు. శని, ఆదివారాలు ప్రజల మీదికి బుల్డోజర్లు ఎందుకు పోతున్నాయని హైకోర్టు సుప్రీంకోర్టులు చెప్పిన ప్రభుత్వానికి బుద్ధి రాదా.. ఇంగితం రాదా?, ఫుట్‌బాల్ ఆడడానికి సెంట్రల్ యూనివర్సిటీకి వచ్చిన రేవంత్ రెడ్డి ఇప్పుడు తమతో ఫుట్‌బాల్ ఆడుతున్నారని విద్యార్థులు వాపోతున్నారని ఆవేదన వ్యక్తం చేశారు. విద్యార్థుల జుట్టు లాగడం ఆడపిల్లల బట్టలు చింపడమే ప్రజా పాలనా?, హైదరాబాద్ భవిష్యత్తు కోసం, ప్రజల కోసమే సెంట్రల్ యూనివర్సిటీ విద్యార్థులు కొట్లాడుతున్నారు. అక్కడ వాళ్లకు ఇంచు భూమి కూడా లేదు. వేరే రాష్ట్రాల నుంచి వచ్చి హెచ్‌సీయూలో చదువుకుంటున్న విద్యార్థులకు హైదరాబాద్ మీద ఉన్న ప్రేమలో ఇసుమంతైన రేవంత్ రెడ్డికి ఉందా?, అందరిని ఒప్పించి మా ప్రభుత్వంలో ఫార్మాసిటీ కోసం 14000 ఎకరాలను సేకరించాం. ఫ్యూచర్ సిటీ కోసం 14000 ఎకరాలను పెట్టుకొని ప్రజెంట్ సిటీని ఎందుకు ఖరాబ్ చేస్తున్నావు రేవంత్? అని కేటీఆర్ ప్రశ్నించారు.

పశ్చిమ హైదరాబాదులో ఉన్న ఒకే ఒక్క లంగ్స్ స్పేస్.. సెంట్రల్ యూనివర్సిటీ లోని 400 ఎకరాలు. దాన్ని ఎందుకు నాశనం చేస్తున్నారని విద్యార్థులు ప్రశ్నిస్తున్నారని చెప్పారు. తమ గూడును చెదరగొట్టొద్దని అక్కడి నెమళ్లు, పశువులు అరుస్తుంటే, ఏడుస్తుంటే ప్రభుత్వంలోని ఏ ఒక్కరికి బాధనిపిస్తలేదా? అని ప్రశ్నించారు. హెచ్‌సీయూ విద్యార్థుల పోరాటం మీద రెండు రోజులుగా కేసీఆర్ మా పార్టీ నేతలతో పాటు హైదరాబాద్ కు చెందిన కొంతమంది ముఖ్యులతో మాట్లాడుతున్నారని వెల్లడించారు. బీఆర్ఎస్ ప్రభుత్వ హయాంలో హైదరాబాదును గ్రీన్ సిటీగా మార్చి ఎన్నో జాతీయ, అంతర్జాతీయ అవార్డులను సాధించామని ఆయన గుర్తుచేశారు. కేసీఆర్ హయాంలో 270 కోట్ల మొక్కలు నాటి హరిత విప్లవాన్ని సృష్టించామన్నారు. హైదరాబాదులో 7.7శాతం గ్రీన్ కవర్ పెరిగిందని ఫారెస్ట్ సర్వే ఆఫ్ ఇండియా నివేదిక ఇచ్చిందని పేర్కొన్నారు. పర్యావరణ పరిరక్షణలో, గ్రీన్ కవర్ ను పెంచడంలో  తెలంగాణ దేశంలోని నెంబర్ వన్ గా నిలవడం మేము సాధించిన రికార్డ్ అన్నారు. పదేళ్లలో భారతదేశంలోని మెట్రో నగరాల్లో అత్యధికంగా పచ్చదనం పెరిగిన నగరం హైదరాబాద్ టైమ్స్ ఆఫ్ ఇండియా రిపోర్ట్ ఇచ్చిందని తెలిపారు. 

2021లో అత్యధికంగా గ్రీన్ కవర్ పెరిగిందని భారత ప్రభుత్వం పార్లమెంట్లో సమాధానం ఇచ్చిందని, పల్లెల్లో 13657 ఎకరాల్లో 19472 ప్రకృతి వనాలు పెట్టామన్నారు. మండల స్థాయిలో 2011 బృహత్ ప్రకృతి వనాలను 6298 ఎకరాల్లో కేసీఆర్ ప్రభుత్వం పెట్టిందని ఆయన గుర్తుచేశారు. హైదరాబాద్ చుట్టూ 108 అర్బన్ లంగ్ స్పేసెస్ ను ఏర్పాటు చేశాం, పంచాయతీ రాజ్ రోడ్లు, ఆర్ అండ్ బి రోడ్ల వెంట వందలాది కిలోమీటర్లు చెట్లను పెంచామని తెలిపారు. ప్రతి ఊరిలో నర్సరీ ఉన్న ఒకే ఒక్క రాష్ట్ర భారతదేశంలో తెలంగాణ ఒక్కటే అన్నారు. 14,864 నర్సరీలు తెలంగాణలో ఉన్నాయి. 270 కోట్ల మొక్కలు పెట్టిన ఒకే ఒక్క రాష్ట్రం తెలంగాణ అని కేటీఆర్ వివరించారు. పర్యావరణ పరిరక్షణ గురించి మాకు ఎవరూ నీతులు చెప్పాల్సిన అవసరం లేదన్నారు. రియల్ ఎస్టేట్ బ్రోకర్ లాగా హైదరాబాద్ సెంట్రల్ యూనివర్సిటీ 400 ఎకరాలను కబ్జా పెట్టాలనుకుంటున్నారు. మేం ప్రభుత్వంలోకి వచ్చిన తర్వాత ఆ 400 ఎకరాల్లో మొత్తం తెలంగాణలోని అతిపెద్ద ఎకో పార్కును ఏర్పాటు చేస్తామన్నారు. రేవంత్ రెడ్డి విసిరే బిస్కెట్లకు ఆశపడి ఆ భూమిని ఎవరైనా ఒక్క ఇంచు కొనుక్కున్నా ఖచ్చితంగా తిరిగి వెనక్కి తీసుకుంటామని హెచ్చరించారు. అమెరికాలోని మన్ హట్టన్ లో ఉన్న సెంట్రల్ పార్క్ మాదిరిగా ఒక అద్భుతమైన ఎకో పార్కును సెంట్రల్ యూనివర్సిటీ విద్యార్థులకు, హైదరాబాద్ ప్రజలకు గిఫ్టుగా అందిస్తామమని హామీ ఇచ్చారు. హైదరాబాదులో మమ్మల్ని ఏకపక్షంగా గెలిపించిన హైదరాబాద్ ప్రజలకు బహుమతిగా మేము ఈ నిర్ణయం తీసుకున్నామన్నారు. 

ఇప్పుడు భూములు కొనుక్కున్న వాళ్లు తర్వాత మమ్మల్ని అనొద్దు అని ముందే హెచ్చరిస్తున్నానని కేటీఆర్ సూచించారు. రేవంత్ రెడ్డి ప్రభుత్వం రియల్ ఎస్టేట్ విస్తరణ కాంక్షతోనే పనిచేస్తుంది.. మేం మాత్రం భవిష్యత్ తరాల కోసం ఆలోచిస్తున్నామని పేర్కొన్నారు. రాజకీయ నాయకుడు వచ్చే ఎన్నికల కోసం ఆలోచిస్తే రాజనీతిజ్ఞుడు తర్వాతి తరం కోసం ఆలోచిస్తాడని స్పష్టం చేశారు. కోర్టుల్లో బీఆర్ఎస్ హయాంలో కొట్లాడడంతోనే ఆ భూమి ఇవాళ తెలంగాణ ప్రజలకు దక్కిందని గుర్తుచేశారు. రియల్ ఎస్టేట్ కింద అమ్ముకోవడానికి మేము కొట్లాడలేదు. ఢిల్లీలాగా హైదరాబాద్ మారోద్దన్న ఉద్దేశంతో ఆ ప్రాంతంలో ఒక అర్బన్ లంగ్స్ స్పేస్ ఉండాలన్న దూర దృష్టితో మేము కొట్లాడామని తెలిపారు. 

ప్రభుత్వం ఇప్పటికైనా వెనక్కి తగ్గకపోతే, నిర్ణయాన్ని మార్చుకోకపోతే హైదరాబాద్ ప్రజలతో పాటు పెద్ద ఎత్తున మా పార్టీ కార్యకర్తలం, ప్రజా ప్రతినిధులు అందరం హెచ్‌సీయూకి మార్చ్ లాగా తరలి వెళ్తామని కేటీఆర్ ప్రభుత్వాన్ని హెచ్చరించారు. రాజ్యసభలో మా ఎంపీలు సురేష్ రెడ్డి వద్దిరాజు రవిచంద్ర, ఈ విషయాన్ని లేవనెత్తారు కేంద్ర ప్రభుత్వం జోక్యం చేసుకోవాలని డిమాండ్ చేశారు. హెచ్‌సీయూ విద్యార్థులకు న్యాయపరంగా అండగా ఉంటామన్నారు. ఇది రాజకీయ కొట్లాట కాదు.. హైదరాబాద్ భవిష్యత్తు కోసం జరుగుతున్న పోరాటం. ఈ పోరాటంలో మాతో కలిసి వచ్చే పర్యావరణవేత్తలకు అండగా ఉంటామని తెలిపారు. సెంట్రల్ యూనివర్సిటీలో ఎంత జీవ వైవిధ్యం ఉందో ప్రభుత్వానికి అంచనా లేదని విమర్శించారు. యుద్ధానికి పోయినట్టుగా ఈ ప్రభుత్వం హెచ్‌సీయూఫై దండయాత్రకు వెళ్లిందని చెప్పారు. రోహిత్ వేముల మరణంపై నిరసన తెలపడానికి హెచ్‌సీయూకి రాహుల్ గాంధీ వస్తే.. ప్రభుత్వ ఎస్కార్ట్ తో మేము రెండుసార్లు తీసుకెళ్లామన్నారు.

కానీ ఇవ్వాళ అదే హెచ్‌సీయూలో కాంగ్రెస్ ప్రభుత్వం ఆడపిల్లల బట్టలు చించి జుట్టు పట్టుకొని పోలీసులతో కొట్టిపిస్తుందని కేటీఆర్ ధ్వజమెత్తారు. రాహుల్ గాంధీ చెప్పినట్టుగా మొహబ్బత్ కి దుకాణ్ లా కాదు నఫరత్ కా మకాన్ లాగా తెలంగాణ మారిందన్నారు. రాహుల్ గాంధీ ఓ లాపతా లీడర్.. పొలిటికల్ టూరిస్ట్ అని కేటీఆర్ ఎద్దేవా చేశారు. రాహుల్ గాంధీ హైదరాబాద్ సెంట్రల్ యూనివర్సిటీకి వచ్చి ఇక్కడ విద్యార్థులతో కలిసి మాట్లాడాలి తమ ప్రభుత్వం చేస్తున్న పని ఏంటో వాళ్లకు వివరించాలని డిమాండ్ చేశారు. ఎస్‌ఆర్‌డీపీలో భాగంగా కేబీఆర్ పార్క్ చుట్టూ ఫ్లైఓవర్లు కట్టడానికి మా ప్రభుత్వ హయాంలో పిలిచిన టెండర్లను ప్రజల నిరసనలతో రద్దు చేశామని గుర్తుచేశారు. ఇది మా ప్రభుత్వ ప్రజాస్వామిక లక్షణం అన్నారు. మరొకసారి చెప్తున్నా కంచె గచ్చిబౌలిలోని 400 ఎకరాలను మేము తిరిగి అధికారంలోకి వచ్చిన తర్వాత స్వాధీనం చేసుకుంటామన్నారు. అక్కడ ఓ అద్భుతమైన లంగ్స్ పేస్ ను ఏర్పాటు చేస్తాం, పర్యావరణ పరిరక్షణకు కట్టుబడి ఉంటాం. జీవ వైవిద్యాన్ని కాపాడుతామని కేటీఆర్ సూచించారు. మా ట్రాక్ రికార్డ్ చూసిన వాళ్లకు మా నిర్ణయంలో ఎలాంటి మార్పు ఉండదని అర్థమవుతుందన్నారు. ఎవరు కూడా ఆ భూముల్ని కొనవద్దు. ఆ వేలంలో పాల్గొనవద్దు. ఆ భూములు హైదరాబాద్ నగరానివి. ఇక్కడి ప్రజలకు మాత్రమే చెందుతాయని వెల్లడించారు.