నల్గొండ,(విజయక్రాంతి): నల్గొండ జిల్లాలో క్లాక్ టవర్ కూడలిలో ఏర్పాటు చేసిన రైతు మహాధర్నాకు బీఆర్ఎస్ వర్కింగ్ ప్రెసిడెంట్ కేటీఆర్ చేరుకున్నారు. బీఆర్ఎస్ ఆధ్వర్యంలో నిర్వహించే రైతు మహాధర్నాలో కేటీఆర్ పాల్గొన్నారు. నాగార్జున కళాశాల వద్ద తెలంగాణ తల్లి విగ్రహానికి పూలమాల వేసి నివాళులర్పించారు. ఎంజీ కళాశాల నుంచి క్లాక్ టవర్ కూడలి వరకు భారీ ర్యాలి జరిగింది.  ఈ బీఆర్ఎస్ ర్యాలీలో కేటీఆర్, పార్టీ నేతలు పాల్గొన్నారు.

అంతకు ముందు నల్లగొండ రైతు మహాధర్నాకు బయలుదేరిన క్రమంలో, మార్గ మధ్యలో కేటీఆర్ పలువురు అభిమానులను ఆప్యాయంగా కలిసి ఫోటోలు దిగారు. కడపకు చెందిన ఒక కుటుంబంలోని చిన్నారులతో ప్రత్యేకంగా ఫోటో దిగారు. చిట్యాల మండలం పెద్ద కాపర్తి వద్ద బీఆరఎస్ పార్టీ జెండాను ఎగరవేశారు. అనంతరం నల్గొండ మహాత్మా గాంధీ యూనివర్సిటీ విద్యార్థులు కేటీఆర్ ను కలిశారు. యూనివర్సిటీలో తమకు సరైన వసతులు లేవని,  గొడ్డుకారం పెడుతున్నారంటూ వాపోయారు. తమను వేధిస్తున్న వైస్ ఛాన్స్ లర్ ను తొలగించేలా రాష్ట్ర ప్రభుత్వంపై ఒత్తిడి తీసుకురావాలని కేటీఆర్ విద్యార్థులు కోరారు.