హైదరాబాద్,(విజయక్రాంతి): సోషల్ మీడియా పోస్టులు చేస్తున్నాడని బీఆర్ఎస్ నాయకుడు వరద భాస్కర్ ని మహబూబ్ నగర్ వన్ టౌన్ సీఐ కొట్టారు. ముఖ్యమంత్రి రేవంత్ రెడ్డి ఇచ్చిన హామీలను ప్రశ్నిస్తూ వాట్సాప్‌లో పోస్టులు పెట్టినందుకు మహబూబ్ నగర్ వన్ టౌన్ ప్రాంతంలో నివసించే వరదా భాస్కర్ ముదిరాజ్‌ను పోలీసులు స్టేషన్ కు తీసుకొచ్చి టైర్ బెల్టుతో చితకబాదారు. ఈ నేపథ్యంలో బీఆర్ఎస్ వర్కింగ్ ప్రెసిడెంట్ కేటీఆర్ వరదా భాస్కర్ ముదిరాజ్‌కు ఫోన్ చేసి పరామర్శించారు. ఇలాంటి ఎన్ని కేసులు పెట్టినా భయపడేది లేదని, అన్నివిధాలుగా భాస్కర్ కు అండగా ఉంటామని హామీ ఇచ్చారు. ఇదిలా ఉండగా.. మాజీ మంత్రి శ్రీనివాస్ గౌడ్, తెలంగాణ రాష్ట్ర మాజీ కార్పొరేషన్ చైర్మన్లు రాజీవ్ సాగర్, అంజనేయ గౌడ్, పల్లె రవి, మాజీ కమిషన్ సభ్యులు శుభాపటెల్, కిశోర్ గౌడ్, ఉపేంద్ర అందరూ కలిసి వరద భాస్కర్ ను పరామర్శించారు. అనంతరం వీరన్నపేట నుంచి వన్ టౌన్ వరకు ర్యాలీగా వెళ్లి వన్ టౌన్ పోలీస్ స్టేషన్ ముందు బైఠాయించారు.