ఆదిలాబాద్,(విజయక్రాంతి): ఆదిలాబాద్ జిల్లా నుంచి క్రికెట్ క్రీడాకారుడిగా రాణిస్తూ హైదరాబాద్ తరపున రంజీ ట్రోఫీలో ఆడుతున్న కొడిమెల హిమతేజ తొలి సెంచరీ సాధించారు. రాజస్థాన్ తో శనివారం జరిగిన మ్యాచ్ లో ఆయన శతకం సాధించగా, క్రీడాభిమానులు అభినందనలు తెలియచేశారు. జిల్లా నుండి రంజీ ట్రోఫీకి తొలిసారిగా ప్రాతినిధ్యం వహిస్తున్న హిమతేజ ట్రోఫీ ఆద్యంతం అత్యుత్తమ ప్రదర్శన కనబరుస్తున్నారు. తాజాగా సెంచరీ సాధించడంతో ఆయన ఆట తీరుపై ప్రశంసలు వెల్లువెత్తుతున్నాయి.

పట్టణ ప్రముఖులు, క్రీడాకారులు హిమతేజకు సామజిక మాధ్యమాల వేదికగా అభినందనలు తెలుపుతున్నారు. ట్రోఫీ మొదటి నుండి అద్వితీయ ప్రదర్శన కబరుస్తున్నారు. ట్రోఫీ లో జరిగిన 7 ఇన్నింగ్స్ లో 63.3 సరాసరితో 380 పరుగులు సాధించి.. అత్యధిక పరుగులు సాధించిన జాబితాలో తొమ్మిదవ స్థానంలో నిలిచారు. మాజీ మంత్రి జోగురామన్న సైతం హిమతేజ సెంచరీ పట్ల హర్షం వ్యక్తం చేశారు. ట్విట్టర్ వేదికగా అభినందనలు తెలియచేసిన ఆయన... జిల్లా నుండి తొలిసారిగా రంజీ ట్రోఫీలో పాల్గొనడంపై అభినందించారు.