‘పుష్ప ది రైజ్’ చిత్రంలో అల్లు అర్జున్- సమంతలపై చిత్రీకరించిన ‘ఊ అంటావా మామా ఊఊ అంటావా’ సాంగ్ జాతీయ స్థాయిలో ఎంత పాపులర్ అయ్యిందో తెలిసిందే. ఇప్పుడు తాజాగా ‘పుష్ప-2’లో  చిత్రీకరిస్తున్న మాసివ్ నెంబర్ దానికి మించి ఉండబోతోందట. ‘కిస్సిక్’ అనే ఈ పాటలో తన సూపర్బ్ డ్యాన్స్‌తో టాలీవుడ్ స్టార్ అల్లు అర్జున్ అభిమానులను, ప్రేక్షకులను ఉర్రూతలూగించబోతున్నాడు.

ఈ పాటలో డ్యాన్సింగ్ క్వీన్ శ్రీలీల జత కడుతోంది. ఈ విషయాన్ని ప్రకటిస్తూ మేకర్స్ ఆదివారం ఓ పోస్టర్‌ను విడుదల చేశారు. ప్రస్తుతం చిత్రీకరణ చివరి దశలో ఉండగా మరో వైపు నిర్మాణానంతర పనులు సైతం వేగంగా నిర్వహిస్తోంది మూవీ టీమ్.

సుకుమార్ దర్శకత్వంలో నవీన్ ఎర్నేని, యలమంచిలి రవిశంకర్ నిర్మిస్తున్న ఈ చిత్రం ప్రమోషన్స్‌ను త్వరలోనే పాట్నా, కలకత్తా, చెన్నయ్, కొచ్చి, బెంగళూరు, ముంబయ్, హైదరాబాద్‌లో నిర్వహించనున్నారు. డిసెంబర్ 5న ప్రపంచవ్యాప్తంగా ప్రేక్షకుల ముందుకు రానుందీ చిత్రం.