హైదరాబాద్, మార్చి 23 (విజయక్రాంతి): ప్రొఫెషనల్ రిస్క్ మేనేజర్స్ ఇంటర్నేషనల్ అసోసియేషన్ (పీఆర్‌ఎమ్‌ఐఏ) ఆధ్వర్యంలో ఈ నెల 22న హైదరా బాద్‌లోని నిమ్స్‌ఎంఈ ఇనిస్టిట్యూట్ ప్రాంగణంలో సెమినార్, సింపోజియం నిర్వహించింది. బ్యాంకర్లు, నిపుణులు, కన్సల్టెంట్లు, విద్యార్థులు, ఆర్థిక జర్నలిస్టులతో సహా దాదాపు 120 మంది హాజరయ్యారు. సీనియర్ బ్యాంకర్లు, డైరెక్టర్ల సమక్షంలో తెలంగాణ, ఆంధ్రప్రదేశ్ రాష్ట్రాలను కవర్ చేసే హైదరాబాద్ చాప్టర్‌కు కొత్త ప్రాంతీయ డైరెక్టర్‌గా డాక్టర్ కిశోర్ నూతలపాటిని నియమించారు. ఈ స్వచ్ఛంద నాయకత్వ హోదాలో, భారతదేశంలో రిస్క్ మేనేజ్మెంట్ వృత్తిని ప్రోత్సహించడానికి డాక్టర్ కిశోర్ స్టీరింగ్ కమిటీ, సీఈవో, డైరెక్టర్ల బోర్డుతో దగ్గరగా పని చేస్తారు.

డాక్టర్ కిషోర్ నూతలపాటి 15 సంవత్సరాలకు పైగా పీఆర్‌ఎమ్‌ఐఏతో అనుబంధం కలిగి ఉన్నారు. ఇందులో స్వచ్ఛంద సేవకుడిగా కూడా ఉన్నారు. జాతీయ సీఈవోలతో పనిచేశారు. డాక్టర్ కిశోర్ ఒక ఆర్థికవేత్త, కార్పొరేట్ ఫైనాన్స్ ప్రొఫెషనల్. అతను నియంత్రణ సంస్థలకు చురుకైన విధాన సహకారి. అతను తెలంగాణ ప్రభుత్వ ఎంసీఆర్‌హెచ్‌ఆర్‌డీఐటీగా గౌరవ ఫెలోగా ఉన్నారు. విధాన సూచనలను అందించడం ద్వారా ఐక్యరాజ్యసమితికి మద్దతు ఇచ్చే సమాంతర సంస్థలతో సంబంధం కలిగి ఉన్నారు.

ఈ కార్యక్రమంలో ఎస్‌బీఐ చీఫ్ జనరల్ మేనేజర్, పీఆర్‌ఎమ్‌ఐఏ గ్లోబల్ బోర్డ్ డైరెక్టర్ కె. వేణుగోపాల్ పట్నాయక్, ఎస్‌బీఐ జనరల్ మేనేజర్ సత్యబ్రత మోహపాత్ర, స్టేట్ బ్యాంక్ స్టాఫ్ కాలేజ్ డైరెక్టర్, ఐఐఆర్‌ఎం ప్రొఫెసర్, మాజీ సీనియర్ బ్యాంకర్, బ్యాంకుల విద్యాసంస్థల మాజీ డైరెక్టర్ ప్రొఫెసర్ కెంబాయి శ్రీనివాసరావు, ఎస్‌బీఐ జనరల్ మేనేజర్ విజయలక్ష్మి ముద్దు, పీఆర్‌ఎమ్‌ఐఏ ఇండియా మాజీ సీఈవో డాక్టర్ నిరాకర్ ప్రధాన్ పాల్గొన్నారు.