హైదరాబాద్‌: అబిడ్స్ పరిధిలోని కట్టెలమండిలో కిడ్నాపైన బాలిక ఆచూకీ లభ్యం అయింది. కొత్తూరు మండలం ఇనుములనర్వ దగ్గర ఆరేళ్ల పాప ప్రగతిని పోలీసులు గుర్తించారు. కిడ్నాప్ కు గురైన బాలికను కొత్తూరు నుంచి అబిడ్స్ కు తరలించారు. చిన్నారిని సైఫాబాద్ భరోసా సెంటర్ కు పోలీసులు తరలించారు. బాలికను కిడ్నాప్ చేసిన వ్యక్తిని పోలీసుల అదుపులోకి తీసుకున్నారు. నిన్న అబిడ్స్ లో ఆడుకుంటున్న బాలికను దుండగులు ఆటోలో తీసుకెళ్లారు. కిడ్నాపర్ బిలాల్ పై గతంలో కేసులు ఉన్నట్లు పోలీసులు వెల్లడించారు. బిలాల్.. చిన్నారులను కిడ్నాప్ చేసి బిహార్ లో విక్రయిస్తున్నట్లు పోలీసులు గుర్తించారు. కిడ్నాపర్ ఇప్పటివరకు ఎంతమంది చిన్నారులను కిడ్నాప్ చేశాడో అనే కోణంలో పోలీసులు విచారిస్తున్నారు. సీసీ కెమెరాల ఆధారంగా చిన్నారి కిడ్నాప్ కేసును పోలీసులు చేధించారు. ఐదు పోలీసు బృందాలు కిడ్నాపర్ ను పట్టుకునేందుకు రంగంలోకి దింపినట్లు అధికారులు తెలిపారు. పాప బంధువులు కిడ్నాపర్ కు దేహాశుద్ది చేశారు. ఆరేళ్ళ బాలిక కిడ్నాప్ కేసును గంటల వ్యవధిలోనే చేధించిన అబిడ్స్ పోలీసులపై పాప కుటుంబీకులు ప్రశంసలు కురిపించారు.