హైదరాబాద్: రాజకీయాల్లో కల్వకుంట్ల చంద్రశేఖర్ రావు (Kalvakuntla Chandrashekar Rao) రాజకీయ యుగం ముగిసిందని తెలంగాణ ప్రదేశ్ కాంగ్రెస్ కమిటీ (టిపిసిసి) అధ్యక్షుడు మహేష్ కుమార్ గౌడ్ పేర్కొన్నారు. తెలంగాణ ఉద్యమ నాయకుడిగా మాత్రమే కెసిఆర్ గౌరవించబడతారని, కెసిఆర్ అలా చెప్పినంత మాత్రాన రాష్ట్రంలో కాంగ్రెస్ పార్టీ ప్రజాదరణ తగ్గుతుందా అని ఆయన ప్రశ్నించారు. నిజామాబాద్‌లో మీడియాతో మాట్లాడిన మహేష్ కుమార్ గౌడ్(Bomma Mahesh Kumar Goud), తెలంగాణ ప్రజలు కాంగ్రెస్ పార్టీ వెనుక దృఢంగా ఉన్నారని చెప్పారు. “ప్రజలు మనతో ఉన్నప్పుడు మన ప్రజాదరణ ఎలా తగ్గుతుంది?” అని ఆయన ప్రశ్నించారు.

కేసీఆర్‌ను విమర్శిస్తూ, “ఫామ్‌హౌస్‌లో కూర్చుని, పెన్ను, కాగితంతో గ్రాఫ్‌లు గీస్తున్న ఎవరైనా రాష్ట్రంలో కాంగ్రెస్ పార్టీ(Congress party) స్థానాన్ని నిర్ణయించగలరా?” అని వ్యాఖ్యానించారు. వెనుకబడిన తరగతుల (బిసి)లో 56శాతం మంది కాంగ్రెస్ పార్టీకి మద్దతు ఇస్తున్నారని ఆయన పేర్కొన్నారు. ప్రభుత్వం తన మొదటి సంవత్సరంలో సాధించిన విజయాలను హైలైట్ చేస్తూ, “మేము 56,000 ఉద్యోగాలు ఇచ్చాము. వ్యవసాయ రుణమాఫీతో సహా కీలక వాగ్దానాలను నెరవేర్చాము. మన ప్రజాదరణ తగ్గుతోందని ఎవరైనా ఎలా చెప్పగలరు?” అని తెలిపారు.

కేసీఆర్ రాజకీయ ప్రభావం పూర్తిగా కుప్పకూలిపోయి ఇప్పుడు ఆయన ఫాంహౌస్ కే పరిమితమైందని మహేష్ కుమార్ గౌడ్ ఆరోపించారు. రాబోయే రోజుల్లో భారత రాష్ట్ర సమితి (Bharat Rashtra Samithi) పూర్తిగా తుడిచిపెట్టుకుపోతుందని, కేసీఆర్, ఆయన కుమారుడు మాత్రమే ఆ పార్టీలో ఉంటారని ఆయన జోస్యం చెప్పారు. తిరిగి అధికారంలోకి రావాలని కేసీఆర్ పగటి కలలు కంటున్నారని, రాజకీయాల నుంచి శాశ్వతంగా తప్పుకోవాలని కూడా ఆయన సూచించారు. రాబోయే గ్రాడ్యుయేట్ నియోజకవర్గ ఎన్నికలను ప్రస్తావిస్తూ, అభ్యర్థిని నిలబెట్టే బలం బీఆర్ఎస్ కు లేదని మహేష్ కుమార్ గౌడ్ ఎద్దేవా చేశారు. “గ్రాడ్యుయేట్ ఎన్నికల్లో కూడా పోటీ చేయలేని పార్టీ తిరిగి అధికారంలోకి వస్తుందని చెప్పుకోవడం విడ్డూరం” అని ఆయన వ్యాఖ్యానించారు.