అందుకే బైడెన్ రేసు నుంచి వైదొలిగారు: వైట్‌హౌస్

వాషింగ్టన్ డీసీ, నవంబర్ 8: అమెరికా అధ్యక్ష రేసునుంచి వైదొలిగి ఉపాధ్యక్షురాలు కమలాహ్యారిస్‌కు మద్దతివ్వడం సరైన నిర్ణయమని అమెరికా అధ్యక్షుడు జో బైడెన్ విశ్వసించినట్లు వైట్‌హౌస్ పేర్కొంది. ఎన్నికల నుంచి తప్పుకొని ఆయన స్థానంలో కమలను నిలబెట్టినందుకు ఆయన గర్వించారని వైట్‌హౌస్ ప్రెస్ సెక్రటరీ కరీన్ జీన్ పియర్ పేర్కొన్నారు. డెమోక్రాట్ల తరఫున పోటీ చేయడానికి కమల సిద్ధంగా ఉన్నారని ఆయన విశ్వసించినట్లు వెల్లడించారు.

అధ్యక్షుడిగా బైడెన్ ఎన్నో అభివృద్ధి కార్యక్రమాలు నిర్వహించినప్పటికీ ప్రపంచ దేశాల నుంచి ఆటంకాలు ఎదురయ్యాయని, ముఖ్యంగా కొవిడ్ మూలంగా పాలనా సంబంధమైన విషయాల్లో అస్థిరత ఏర్పడిందని.. ఇది రాజకీయంగా బైడెన్‌కు నష్టం కలిగించిందని అనారు. పదవుల కంటే ప్రమాదంలో ఉన్న ప్రజాస్వామ్యాన్ని రక్షించడమే ముఖ్యమంటూ వైదొలగాలన్న తన నిర్ణయాన్ని అప్పట్లో బైడెన్ సమర్థించుకున్నారు. నియంత నిరంకుశల కంటే దేశం గొప్పదని బైడెన్ తెలిపారన్నారు. ఉపాధ్యక్షురాలు సమర్థురాలంటూ ఓవల్ ఆఫీసు నుంచి చేసిన ప్రసంగంలో బైడెన్ ప్రశంసించారు.