ఆంధ్రప్రదేశ్ మున్సిపల్ అడ్మినిస్ట్రేషన్, పట్టణాభివృద్ధి మంత్రి పొంగూరు నారాయణ కుమార్తె డాక్టర్ శరణి రాసిన ‘మైండ్‌సెట్ షిఫ్ట్’ పుస్తకావిష్కరణ కార్యక్రమం గురువారం విజయవాడలోని ఓ కన్వెన్షన్ హాల్‌లో జరిగింది. ఏపీ సీఎం చంద్రబాబు నాయుడు, సినీ నటుడు చిరంజీవి ఈ కార్యక్రమానికి ముఖ్య అతిథులుగా హాజరయ్యారు. ఈ కార్యక్రమంలో చంద్రబాబు మాట్లాడుతూ.. ‘సానుకూల ఆలోచన, బలమైన అంకితభావమే విజయాన్ని సాధించడంలో తోడ్పడతాయి.

చిరంజీవి సినిమా నేపథ్యం లేని సాధారణ కుటుంబం నుంచి వచ్చారు. నటుడు కావాలనే ఆయన సంక ల్పం, మనస్తత్వం ఆయన గొప్ప శిఖరాలకు చేరుకోవడానికి దోహదపడింది. ఎన్టీఆర్ రాజకీయాల్లోకి వచ్చిన తర్వాత చిరంజీవి అవకాశాన్ని ఉపయోగించుకుని తీవ్ర కృషి, దృఢ సంకల్పంతో ఆ శూన్యాన్ని పూరించడం ద్వారా చిత్ర పరిశ్రమలో ఎదిగారు. సామాజిక సేవ చేయాలన్న గొప్ప ఆలోచనతో ముందుకు వచ్చిన మొదటి నటుడు చిరంజీవి.

నేను ఉమ్మడి ఆంధ్రప్రదేశ్ ముఖ్యమంత్రిగా ఉన్నప్పుడు, చిరంజీవిని క్రమం తప్ప కుండా కలిసేవాడిని. ఓ సమావేశంలో బ్లడ్‌బ్యాంక్ ఏర్పాటుకు భూమి కేటాయించమని ఆయన నన్ను కోరారు. సినిమా నటులు సినిమాను దాటి ఆలోచించి ప్రజాసేవపై దృష్టి పెట్టడం చాలా అరుదు. కానీ అలాంటి చొర వ తీసుకున్న మొదటి నటుడిగా చిరంజీవి నిలిచారు’ అని కొనియాడా రు.

చిరంజీవి మాట్లాడుతూ.. ‘వ్యక్తిత్వ వికాస పుస్తకాల పట్ల నాకు ఎప్పుడూ ఆసక్తి ఉంటుంది. ప్రతి ఒక్కరూ కష్టపడతారు. కానీ తెలివిగా పనిచేయడం, సరైన మనస్తత్వాన్ని పెంపొందిం చుకోవడం ముఖ్యం. ఈ పుస్తకమంతా దాని గురించే. నా గ్రాడ్యుయేషన్ తర్వాత నాకు కెరీర్ మీద ఓ స్పష్టత లేదు. ఉంటే సినిమా పరిశ్రమలో ఉండాలి లేకుంటే ఎక్కడా ఉం డొద్దు అని నిర్ణయించుకున్నాను. విజయం సాధించడానికి అవిశ్రాంతంగా పనిచేశాను.

ఆ అంకితభావం నన్ను ఈరోజు ఈ స్థాయికి తీసుకువచ్చింది. నిజాయితీ, వ్యక్తిత్వం, వినయం కలయిక వల్ల విజయం మనల్ని వరిస్తుంది. చాలా మంది గొప్ప విషయాలను సాధిస్తారు. కానీ వ్యక్తిత్వం లేకుండా, వారు శాశ్వత గౌరవాన్ని పొందలేరు. మీరు ఎంత దూరం వెళ్లినా, మీ విలువలు, సమగ్రతే మీ ప్రయాణాన్ని నిజంగా నిర్వచిస్తుంది. జీవితం కేవలం ఒక నడక లాంటిది కాదు.

ప్రతి అడుగులోనూ సవాళ్లు, అడ్డంకులతో నిండి ఉంటుంది. కానీ సంకల్పం బలం ఉం టే ఏదైనా సాధించగలం. నా కెరీర్ ప్రారంభ రోజుల్లో నాకు తరుచూ సహాయక, ప్రతికూల పాత్రలే వస్తుండేవి. చాలా నిరాశ చెం దేవాడిని. కానీ వచ్చిన ప్రతీ పాత్ర నా విజయానికి ఒక మెట్టుగా మారాలని భావించా ను. ప్రతి పాత్రను నిజాయితీ, నమ్మకంతో పోషిస్తూ న్యాయం చేశాను.

ఆ స్థిరత్వం ఫలించి, ప్రేక్షకులు నాలోని స్పార్క్‌ను గమనించారు. నా ప్రతిభను వారు గుర్తించి ప్రధా న పాత్రలకు తలుపులు తెరిచారు. కాలక్రమేణా నటుడి నుంచి స్టార్‌గా ఎదిగాను. ‘మైండ్‌సెట్ షిఫ్ట్’ పుస్తకం చాలా మందికి వారి వ్యక్తిత్వాలను అభివృద్ధి చేసుకోవడానికి సహాయపడుతుంది’ అని చెప్పారు.