ప్రత్యేక పూజలు చేస్తున్న రాజ్యసభ సభ్యుడు డాక్టర్ కే లక్ష్మణ్

ఎన్టీఆర్ స్టేడియంలో కొనసాగుతున్న కోటి దీపోత్సవం

ముషీరాబాద్, నవంబర్ 12: కార్తీక మాసం సందర్భంగా భక్తి టీవీ అధినేత నరేంద్ర చౌదరి ఆధ్వర్యంలో నగరంలోని ఎన్టీఆర్ స్టేడియంలో నిర్వహిస్తున్న కోటి దీపోత్సవం వైభవంగా కొనసాగుతోంది. మంగళవారం సాయంత్రం మాతామాణికేశ్వరి వేద పాఠశాల హైదరాబాద్ ఆధ్వర్యంలో వేదపఠనం నిర్వహించారు. ప్రాంగణంలో మహాశివలింగానికి ప్రదోషకాల అభిషేకం నిర్వహించారు. మల్లా ప్రగడ శ్రీమన్నారాయణ మూర్తి ప్రవచనం చేశారు. వేదికపై కంచి కామాక్షి అమ్మవారికి, శృంగేరీ శారద అమ్మవారికి కోటి పసుపు కొమ్ములతో సుమంగళీ పూజలు నిర్వహించారు.

అనంతరం గుజరాత్‌లోని మాగోడ్ శాంతి మందిర్ వ్యవస్థాపకులు మహామండ లేశ్వర్ నిత్యానంద స్వామి, హైదరాబాద్ ఆర్షవిద్యాగురుకులం సర్వవిదానంద సరస్వతీ స్వామి నేతృత్వంలో ఆలంపురం జోగుళాంబ కల్యాణోత్సవాన్ని నిర్వహించారు. వేడుకలకు బీజేపీ ఓబీసీ మోర్చా జాతీయ అధ్యక్షుడు, రాజ్యసభ సభ్యుడు డాక్టర్ లక్ష్మణ్ హాజరై శివలింగానికి ప్రత్యేక పూజలు చేసి స్వామివారికి పట్టు వస్త్రాలు సమర్పించారు. భక్తులు అధిక సంఖ్యలో పాల్గొన్నారు.