యాదాద్రి భువనగిరి, జూలై 5 (విజయక్రాంతి): యాదాద్రి భువనగిరి జిల్లా కేంద్రం భువనగిరిలోని సాయికృప డిగ్రీ, పీజీ కళాశాల, కృషి ఐటీఐ క్యాంపస్‌లో ఈ నెల 6(నేడు)న జాబ్ మేళా నిర్వహిస్తున్నట్టు కళాశాల కరస్పాండెంట్ దరిపల్లి ప్రవీణ్‌కుమార్ శుక్రవారం ఒక ప్రకటనలో తెలిపారు. హైదరాబాద్‌కు చెందిన సమర్థనం ట్రస్ట్ ఆధ్వర్యంలో జాబ్ మేళా నిర్వహిస్తున్నట్టు పేర్కొన్నారు. డేటా ఎంట్రీ, బీపీవో, రిటైల్, హాస్పిటాలిటీ, ఆటోమోటివ్, వైద్యం, ఎలక్ట్రికల్, బ్యూటీ రంగాల్లో ఉద్యోగావకాశాలు కల్పించనున్నట్లు వెల్లడించారు. ఉదయం 9 గంటల నుంచి నిర్వహించే ఈ జాబ్ మేళాకు 18 నుంచి 35 ఏళ్ల మధ్య వయసు ఉన్న యువతీయువకులు హాజరు కావొచ్చని పేర్కొన్నారు. పదో తరగతి నుంచి పీజీ, ఒకేషనల్, ఐటీఐ, డిప్లొమా విద్యార్హతలు ఉన్నవారు అర్హులని తెలిపారు. అభ్యర్థులు బయోడెటా ఫారం, విద్యార్హతల సర్టిఫికెట్ల జిరాక్స్‌లతో హాజరుకావాలని సూచించారు. జిల్లాలోని నిరుద్యోగ యువత ఈ అవకాశాన్ని సద్వినియోగం చేసుకోవాలని సూచించారు.