ప్రభుత్వ విప్, ధర్మపురి ఎమ్మెల్యే అడ్లూరి లక్ష్మణ్ కుమార్..

జగిత్యాల (విజయక్రాంతి): సమానత్వం, సామాజిక న్యాయం కోసం అహర్నిశలు శ్రమించిన డా. బాబు జగ్జీవన్ రామ్ జీవితం ప్రతి ఒక్కరికీ మార్గదర్శకమని ప్రభుత్వ విప్ అడ్లూరి లక్ష్మణ్ కుమార్ పేర్కొన్నారు. శనివారం జిల్లా షెడ్యూల్డ్ కులాల అభివృద్ధి శాఖ ఆధ్వర్యంలో మంచినీళ్ల భావి చౌరస్తా వద్ద నిర్వహించిన డాక్టర్ బాబు జగ్జీవన్ రామ్ 118వ  జయంతి కార్యక్రమంలో ప్రభత్వ విప్ అడ్లూరి లక్ష్మణ్ కుమార్, ఎమ్మెల్సీ తాటిపర్తి జీవన్ రెడ్డి, అడిషనల్ కలెక్టర్ లత, దళిత నాయకులు ఆయన విగ్రహంకు పూలమాలలు వేసి ఘనంగా నివాళులర్పించారు. ఈ సందర్బంగా ఏర్పాటు చేసిన సమావేశంలో ప్రభుత్వ విప్ అడ్లూరి మాట్లాడుతూ.. బాబు జగ్జీవన్ రామ్ స్వాతంత్ర సమరయోధుడిగా మాత్రమే కాకుండా, స్వాతంత్రం అనంతర భారత నిర్మాణంలో అపూర్వమైన సేవలందించిన మహనీయుడన్నారు.

1908 ఏప్రిల్ 5న జన్మించిన ఆయన, స్వాతంత్ర ఉద్యమంలో పాల్గొని, అనంతరం దేశ నిర్మాణంలో కీలక పాత్ర పోషించిన గొప్ప నాయకుడిగా నిలిచారని తెలిపారు. ఆయన అత్యంత కాలం కేబినెట్ మంత్రిగా కొనసాగిన ఘనత గల నేత మాత్రమే కాకుండా, భారత మాజీ ఉప ప్రధాన మంత్రి గా, కార్మిక శాఖ మంత్రిగా, వ్యవసాయ మంత్రిగా, రక్షణ మంత్రిగా వివిధ కీలక బాధ్యతలు నిర్వహించారని తెలిపారు. వ్యవసాయ మంత్రిగా పనిచేసి గ్రీన్ రివల్యూషన్‌ను సమర్థవంతంగా అమలు చేసి దేశాన్ని ఆహార ధాన్యాల పరంగా స్వయం సమృద్ధిగా మార్చిన వారని పేర్కొన్నారు. రక్షణ మంత్రిగా ఇండో-పాక్ యుద్ధ సమయంలో భారతదేశానికి విజయాన్ని సాధించిపెట్టడంలో ఆయన నాయకత్వం విశేషమని, బంగ్లాదేశ్ స్వాతంత్రంలో ఆయన పాత్రను మరువలేమన్నారు. సామాజిక  విప్లవానికి ఆయన చేసిన కృషి అపూర్వమని, డా.బిఆర్. అంబేద్కర్ తీరునే ఆయన కూడా అణగారిన వర్గాల హక్కుల కోసం జీవితాంతం పోరాడారని తెలిపారు. అంటరానితనాన్ని నిర్మూలించేందుకు చేసిన కృషి సమాజానికి దిశానిర్దేశకంగా నిలిచాయని అన్నారు.

సమానత్వం, సామాజిక న్యాయం కోసం అహర్నిశలు శ్రమించిన నేతగా బాబు జగ్జీవన్ రామ్ భారత చరిత్రలో నిలిచిపోయారని అభిప్రాయపడ్డారు. నేటి యువత ఆయన జీవితం నుండి ప్రేరణ పొందాలాని, ఆయన ఆదర్శాలను అనుసరించాలన్నారు. జిల్లా అడిషనల్ కలెక్టర్ లత మాట్లాడుతూ.. ఆయన జీవితంలో అంటరానితనం పరిస్థితుల నుంచి ఉప ప్రధాని పదవి వరకు అనేక అంశాలను చూశారని తెలిపారు. చిన్నతనంలో పాఠశాలలో అంటరానితనం సమస్యతో అనేక బాధలు అనుభవించారని, 29 ఏళ్ళ వయస్సులో శాసన మండలి సభ్యునిగా, 1937 లో ప్రత్యక్ష రాజకీయాల్లోకి వచ్చి బీహార్ అసెంబ్లీకి ఎన్నికయ్యారని తెలిపారు. 1946లో తాత్కాలిక ప్రభుత్వంలో మంత్రిగా పని చేశారని, స్వాతంత్రం వచ్చిన తర్వాత కేంద్ర ప్రభుత్వంలో 30 సంవత్సరాల పాటు వివిధ మంత్రిత్వ శాఖలలో పని చేశారని తెలిపారు. ‌వివిధ సంఘాల నాయకులు, ప్రతినిధులు మాట్లాడారు. ఈ కార్యక్రమంలో  మాజీ ఎమ్మెల్సీ జీవన్ రెడ్డి. మాజీ మున్సిపల్ కమిషనర్ విజయలక్ష్మి, ఆర్డీవో మధుసూదన్, డిఎస్పి రఘుచందర్, మున్సిపల్, రెవెన్యూ అధికారులు, జిల్లా షెడ్యూల్ కులాల అభివృద్ధి అధికారి రాజ్కుమార్, ఎస్సీ, బీసీ, ఎస్టీ, వివిధ సంఘాల నాయకులు, జిల్లా అధికారులు పాల్గొన్నారు.