భద్రాద్రి కొత్తగూడెం (విజయక్రాంతి): భద్రాద్రి కొత్తగూడెం జిల్లా లక్ష్మీదేవి పల్లి మండలం మారుమూల గ్రామమైన రేగళ్ల తండాకు చెందిన సాయి కిరణ్ ఈనెల ఒకటో తేదీ నుండి నాలుగో తేదీ వరకు మంచిర్యాల జిల్లా గాంధారిలో జరిగిన రాష్ట్రస్థాయి హాకీ పోటీలలో పాల్గొని ఉత్తమ ప్రతిభ కనబరిచి జాతీయస్థాయి హాకీ పోటీల్లో పాల్గొనడం సంతోషకరమని ఐటిడిఏ ప్రాజెక్టు అధికారి బి. రాహుల్ అన్నారు. శుక్రవారం నాడు తన చాంబర్లో జార్ఖండ్ రాష్ట్రంలోని రాయపూర్ లో జరిగే జాతీయస్థాయి హాకి పోటీల్లో పాల్గొనే సాయి కిరణ్ ను అభినందిస్తూ పదివేల రూపాయల విలువగల హాకీ కిట్టును ఆయన అందించారు.

ఈ సందర్భంగా ఆయన మాట్లాడుతూ.. దుమ్ముగూడెం మండలం గిరిజన ఏకలవ్య మోడల్ రెసిడెన్షియల్ పాఠశాలలో పదవ తరగతి చదువుతున్న సాయికిరణ్ తో పాటు విద్యార్థిని, విద్యార్థులు చదువులోనే కాదు ఆటల్లో కూడా అద్వితీయమైన ప్రతిభను ప్రదర్శిస్తున్నారని, రాష్ట్రస్థాయి క్రీడలలో అద్భుతమైన ప్రతిభ చూపి జాతీయస్థాయి హాకీ పోటీల్లో పాల్గొనడం చాలా గర్వకారణమని, జాతీయస్థాయిలో కూడా మంచిగా ప్రతిభ కనబరిచి శిక్షణ అందించిన కోచులకు ఉపాధ్యాయులకు, మీ గ్రామానికి తల్లిదండ్రులకు పాఠశాలకు మంచి పేరు ప్రతిష్టలు తీసుకొని రావాలని ఆయన అన్నారు. ఈ కార్యక్రమంలో క్రీడల అధికారి గోపాలరావు, ఏ ఎస్ ఓ నాగేశ్వరరావు, ఈ ఏం ఆర్ ఎస్ పి ఈ టి మంగమ్మ తదితరులు పాల్గొన్నారు.