డిజిటల్ యుగంలో సెక్యూరిటీ అనేది పెద్ద తలనొప్పిగా మారింది. బ్యాంకింగ్, ఫేస్‌బుక్, ఈ మెయిల్.. ఇతర ఖాతాలకు పాస్‌వర్డ్ ముఖ్యం. అది ఒక తాళం లాంటిది. అయితే ఈ తాళం భద్రమేనా? సైబర్ దొంగతనాలు విరివిగా జరుగుతున్న ఈ కాలంలో బలహీనమైన పాస్‌వర్డ్ అంటే దొంగచేతికి తాళాలిచ్చినట్టే అంటున్నారు నిపుణులు. ఇటీవల జరిగిన ఓ సర్వే ఏం చెబుతన్నది? హైజీన్ పాస్‌వర్డ్ కోసం ఎలాంటి జాగ్రత్తలు తీసుకోవాలి? అనే విషయాలను వివరించింది. అవేంటో చూద్దాం..

పాస్‌వర్డ్ పెడుతున్నప్పుడు చాలామంది చేస్తున్న తప్పేమిటంటే.. దానిని పేపర్ మీద రాసు కోవడం కాని, ఎలక్ట్రానిక్ ఫార్మాట్‌లో భద్రపరచడంగాని చేస్తున్నారు. అలాగే పుట్టిన తేదీ, పెట్ నేమ్, కుటుంబ సభ్యు ల పేర్లు పెడుతున్నారు. సోషల్ మీడియాలో వ్యక్తిగత వివరాలు పంచుకోవడం వల్ల వాటిని హ్యాకర్లు తమకు అనుకూలంగా మలచుకుంటున్నారు.  ఆఫీసుల్లో అయితే ఐటీ టీమ్ ‘వెల్కం 123’ లాంటి తాత్కాలిక పాస్‌వర్డ్ ఇస్తుంది.

చాలామంది ఉద్యోగులు వాటిని మార్చుకోకుండా కంటి న్యూ చేస్తున్నారు. పాస్‌వర్డ్ చోరీ జరిగిందని అనుమానం వస్తే చెక్ చేసుకునేందుకు కొన్ని వెబ్‌సైట్స్ ఉన్నాయి. అవాస్ట్, ఎఫ్ సెక్యూర్ ఐడెంటిటీ థెఫ్ట్ చక్కర్, సైబర్ న్యూస్, నోట్రాన్, లీక్‌చెక్ వంటి వెబ్‌సైట్లు ఈ విషయంలో అవగామనను పెంచుతాయి.

ప్రతిమూడు నెలలకు..

చాలామంది పాస్‌వర్డ్ ఎవరూ కొట్టేయలేరని అతి విశ్వాసాన్ని ప్రదర్శిస్తారు కాని.. ఇటీవల జరిగిన ఒక పరిశోధనలో వాటిలో 78 శాతం కేవలం ఒక సెకన్‌లోనే క్రాక్ చేయొచ్చని తేలింది. పాస్‌వర్డ్ ఎప్పుడైనా బలంగా ఉండాలి. చిన్నగా కాకుండా.. కనీసం 8 క్యారెక్టర్లు ఉండేలా చూసుకోవాలి. పెద్దవి, చిన్నవి, నంబర్లు, ప్రత్యేక గుర్తులు కలిపి పెట్టుకుంటేనే సేఫ్.

రకరకాల అకౌంట్లకు దేని పాస్‌వర్డ్ దానికే ఉండాలి. అంతేకాని అన్నింటికీ ఒకే పాస్‌వర్డ్ ఉపయోగించడం మంచిది కాదు. పాస్‌వర్డ్‌ను ప్రతి మూడు నెలలకు ఒకసారి మార్చుకోవడం మంచిదని సైబర్ సెక్యూరిటీ నిపుణులు చెబుతున్నారు. ప్రపంచవ్యాప్తంగా 30 లక్షల 18 వేల 50 మంది పాస్‌వర్డ్ 123456. మనదేశంలో ఇదే పాస్‌వర్డ్‌ను 76,981 మంది పెట్టుకున్నట్టు ఒక పరిశోధనలో వెల్లడైంది. 

మనవాళ్లే అధికం..

2014లో హ్యాక్ చేసిన పాస్ వర్డ్‌లలో (టాప్ 200 పాస్‌వర్డ్స్ 2024) భారతీయులు అత్యధికంగా వాడుతున్న వాటిలో టాప్ 5 ఏమిటంటే.. 123456 పాస్‌వర్డ్, 12345678, 123456789, ఎబిసిడి 1234. అదే ప్రపంచవ్యాప్తంగా చూస్తే.. 123456, 12345789, 12345678, పాస్‌వర్డ్, క్వెర్టీ 123 లు ఉన్నాయి.

సాంప్రదాయ పాస్‌వర్డ్‌ల కన్నా.. బయోమెట్రిక్ (వేలిముద్ర, ముఖ గుర్తింపు) మేలు. ఫోర్జరీ చేయడం కష్టమవుతుంది. ఫిషింగ్‌లాంటివి జరగవు. నచ్చిన వారి పేర్లు, పుట్టినతేదీ, వరుస నెంబర్ల వంటివి పాస్‌వర్డ్‌గా పెట్టుకుంటే సైబర్ నేరగాళ్ల పని సులువవుతుంది.