సతీశ్‌బాబు రాటకొండ హీరోగా నటిస్తూ, దర్శకత్వం వహించిన సినిమా ‘జాతర’. దీయా రాజ్ హీరోయిన్‌గా నటించారు. ఈ చిత్రాన్ని రాధాకృష్ణారెడ్డి, శివశంకర్‌రెడ్డి నిర్మించారు. ఈ సినిమా నవంబర్ 8న థియేటర్లోకి రానుంది. ఈ క్రమంలో మేకర్స్ తాజాగా మూవీ ప్రీ రిలీజ్ ఈవెంట్‌ను నిర్వహించారు. ఈ సందర్భంగా సతీశ్‌బాబు మాట్లాడుతూ.. ‘యధార్థ సంఘటనల ఆధారంగా ఈ కథ రాశా.

ఊరి కట్టుబాట్లు, ఆ తంతులు, అందులో జరిగే ఘటనల గురించి చూపించాం’ అని చెప్పారు. ప్రముఖ దర్శక, నిర్మాత తమ్మారెడ్డి భరద్వాజ మాట్లాడుతూ.. ‘మంచి కథ ఉంటే.. హీరో, దర్శకుల గురించి జనం అంతగా పట్టించుకోరు. కొత్తగా వచ్చిన సతీశ్ హీరో, రైటర్, డైరెక్టర్ అయ్యాడు. రిషబ్‌శెట్టిలా పెద్ద హీరో, పెద్ద దర్శకుడు కావాలని కోరుకుంటున్నా’ అని అన్నారు. ఈ కార్యక్రమంలో శివ బాలాజీ, ధృవ వాయు, విశ్వ కార్తికేయ, నిర్మాత శివశంకర్‌రెడ్డి, దీయా రాజ్ తదితరులు పాల్గొన్నారు.