టాలీవుడ్ స్టార్ అల్లు అర్జున్ నుంచి వస్తున్న మరో ప్రతిష్టాత్మక చిత్రం ‘పుష్ప 2’. ఈ చిత్రంలో కథానాయికగా రష్మిక మందన్న నటిస్తున్న విషయం తెలిసిందే. ఈ సినిమా విడుదల సందర్భంగా తన హీరోకు అంతా మంచే జరగాలని కోరుకుంటూ హీరోయిన్ రష్మిక ఒక స్వీట్ గిఫ్ట్ ఇచ్చింది! బన్నీకి వెండి వస్తువు గిప్ట్‌గా పంపిన ఈ అమ్మడు ఓ స్పెషల్ నోట్ కూడా అందులో పెట్టింది.

ఈ విషయాన్ని అల్లు అర్జున్ సోషల్ మీడియా వేదికగా ప్రకటించారు. ‘మనం ఎవరికైనా వెండి బహుమతిగా ఇస్తే వాళ్లకు అదృష్టం కలిసొస్తుందని మా అమ్మ తరచుగా చెబుతుంది. ఈ చిన్న వెండి వస్తువు, స్వీట్స్.. మీకు మరింత అదృష్టం తీసుకొస్తుందని అనుకుంటున్నా. మీకు, మీ కుటుంబానికి దీపావళి శుభాకాంక్షలు’ అని రష్మిక సందేశం పంపింది.

అయితే, ఈ నోట్‌ను షేర్ చేస్తూ.. ‘థాంక్యూ మై డియర్.. ఇప్పుడు మరెంతో అదృష్టం కావాలి’ అని రాసుకొచ్చాడు బన్నీ. ఇదిలా ఉండగా.. ధనుష్, నాగార్జున, శేఖర్ కమ్ముల భాగస్వామ్యంలో వస్తున్న ‘కుబేర’ చిత్రంలోనూ రష్మిక నటిస్తున్న సంగతి తెలిసిందే.

ఈ మూవీ ఫస్ట్ గ్లింప్స్ నవంబర్ 15న రిలీజ్ కానుంది. ఈ విషయాన్ని ప్రకటిస్తూ చిత్రబృందం రష్మిక మందన్న బ్రాండ్ న్యూ పోస్టర్‌ను విడుదల చేసింది.