చేతన్‌కృష్ణ, హెబ్బా పటేల్ నాయకానాయికలుగా నటిస్తున్న సినిమా ‘ధూం ధాం’. సాయికుమార్, వెన్నెల కిషోర్, పృథ్వీరాజ్, గోపరాజు రమణ ఇతర కీలక పాత్రలు పోషిస్తున్నారు. ఈ చిత్రాన్ని దర్శకుడు సాయి కిషోర్ మచ్చా దర్శకత్వంలో ఎంఎస్ రామ్‌కుమార్ నిర్మిస్తున్నారు. గోపీమోహన్ స్టోరీ స్క్రీన్ ప్లే అందిస్తున్న ఈ సినిమా ఈ నెల 8న థియేటర్లలో విడుదల కానుంది.

ఈ నేపథ్యంలో మూవీ ప్రీ రిలీజ్ ఈవెంట్‌ను హైదరాబాద్‌లో నిర్వహించారు. ఈ కార్యక్రమంలో పలువురు దర్శక నిర్మాతలు అతిథులుగా పాల్గొన్నారు. ఈ సందర్భంగా డైరెక్టర్ శ్రీను వైట్ల మాట్లాడుతూ.. “మా రెడీ సినిమాలా ‘ధూం ధాం’ కూడా బ్లాక్ బస్టర్ ఎంటర్‌టైనర్ కావాలి” అని ఆకాంక్షించారు.

హీరో చేతన్ కృష్ణ మాట్లాడుతూ.. ‘మన తెలుగు సినిమాలను కాదని చిన్న డబ్బింగ్ మూవీస్‌కి థియేటర్లు ఇస్తున్నారు.. ఇది బాధ కలిగిస్తోంది. తెలుగు చిత్రాలను ప్రోత్సహించాలని కోరుతున్నా. ప్రేక్షకులు మా సినిమాకు ఒక్క ఛాన్స్ ఇవ్వాలని కోరుకుంటున్నా. సినిమా బాగా లేకుంటే అందరికీ చెప్పండి, బాగుంటే పది మందికి చెప్పిండి. మౌత్ టాక్ కంటే గొప్ప ప్రచారం లేదు. మీకు నవ్వులు గ్యారెంటీ’ అన్నారు.

చిత్ర దర్శకుడు సాయికిషోర్ మచ్చా మాట్లాడుతూ.. “ధూంధాం’తో మీ టికెట్ ధరకు సరిపడా నవ్వులు అందిస్తాం. శ్రీను వైట్ల కామెడీని, వైవీఎస్ సాంగ్స్ స్టుటైల్‌ను స్ఫూర్తిగా తీసుకుని ఈ సినిమా చేశా” అన్నారు. నిర్మాత రామ్‌కుమార్ మాట్లాడుతూ.. ‘ఈ సినిమాకు మా టీమ్ అంతా మనసు పెట్టి పనిచేశారు.

మా అబ్బాయి చేతన్‌ను హీరోగా మరో మెట్టు ఎక్కిస్తుందీ సినిమా’ అని తెలిపారు. ఇంకా ఈ వేడుకలో నిర్మాతలు బెక్కెం వేణుగోపాల్, నిర్మాత దామోదర ప్రసాద్, దర్శకులు వైవీఎస్ చౌదరి, సాయిరాజేశ్ తమ అనుభవాలు, అభిప్రాయాలు పంచుకున్నారు. చిత్రబృందం పాల్గొన్నారు.