చట్టం అందరికీ సమానమేనా?

ఎంపిక చేసిన వారినే టార్గెట్ చేస్తున్నారా?

గచ్చిబౌలి పోలీసుల నోటీసులపై స్పందించిన స్మితా సబర్వాల్

2 వేల మంది రీ పోస్టు చేశారు.. వారిపై ఇలాంటి చర్య తీసుకుంటున్నారా

హైదరాబాద్: కంచ గచ్చిబౌలి సమస్యపై ట్వీట్‌ను తిరిగి పోస్ట్ చేసినందుకు కొన్ని రోజుల క్రితం సైబరాబాద్ పోలీసుల(Cyberabad Police) నుండి నోటీసు అందుకున్న సీనియర్ ఐఏఎస్ అధికారిణి స్మితా సభర్వాల్(IAS officer Smita Sabharwal), గచ్చిబౌలి పోలీసు అధికారులకు పూర్తిగా సహకరించానని, శనివారం చట్టాన్ని గౌరవించే పౌరురాలిగా బిఎన్‌ఎస్‌ఎస్ చట్టం కింద తన వివరణాత్మక ప్రకటన ఇచ్చానని చెప్పారు. శనివారం పోస్ట్ చేసిన ట్వీట్‌లో, ఆమె ఇలా అన్నారు.

''గచ్చిబౌలి పోలీసులకు పూర్తిగా సహకరించా.. చట్టాన్ని గౌరవించే వ్యక్తిగా పోలీసులు అడిగిన ప్రశ్నలకు వివరణ ఇచ్చా. నేను రీ పోస్టు చేసినట్లే 2 వేల మంది చేశారు. వాళ్లందరిపైనా ఇలాంటి చర్య తీసుకుంటున్నారా?.. చట్టం అందరికీ సమానమేనా?, ఎంపిక చేసిన వారినే టార్గెట్ చేస్తున్నారా?'' అని ఆమె ఎక్స్ వేదికగా ప్రశ్నించారు. కంచ గచ్చిబౌలి భూములపై ఏఐ ఇమేజ్ షేర్ చేయడంపై గచ్చిబౌలి పోలీసులు స్మితా సభర్వాల్ కు నోటీసులు ఇచ్చారు. స్మితా సభర్వాల్ ప్రస్తుతం తెలంగాణ యువత అభివృద్ధి, పర్యాటక, సంస్కృతి ప్రిన్సిపల్ సెక్రటరీగా పనిచేస్తున్నారు. భారతీయ నాగరిక్ సురక్ష సంహిత (Bharatiya Nagarik Suraksha Sanhita) సెక్షన్ 179 కింద సైబరాబాద్ పోలీసులు ఆమెకు నోటీసు జారీ చేశారు. ఏఐ జనరేటెడ్ ఇమేజ్ ను ఆమె సోషల్ మీడియాలో తిరిగి పోస్ట్ చేసింది. హెచ్సీయూ  సమస్యకు సంబంధించి చిత్రాలను పోస్ట్ చేసిన వారందరికీ తెలంగాణ పోలీసులు నోటీసులు జారీ చేశారు.