హీరో నితిన్ నుంచి వస్తున్న తాజా కామెడీ ఎంటర్‌టైనర్ ‘రాబిన్‌హుడ్’. ఇందులో శ్రీలీల కథానాయికగా నటించింది. వెంకీ కుడుముల దర్శకత్వం వహించిన ఈ సినిమాను మైత్రి మూవీ మేకర్స్ భారీ బడ్జెట్‌తో నిర్మించారు. రాజేంద్రప్రసాద్ కీలక పాత్ర పోషించగా, ఆస్ట్రేలియా క్రికెటర్ డేవిడ్ వార్నర్ ఓ క్యామియో రోల్‌లో కనిపించనున్నారు. ఈ సినిమాకు సంబంధించి ఇప్పటికే విడుదలైన ప్రమోషనల్ కంటెంట్ ప్రేక్షకుల్లో అంచనాలను పెంచేసింది. జీవీ ప్రకాశ్‌కుమార్ సంగీతం సారథ్యంలో రూపుదిద్దుకున్న ఈ సినిమా పాటలు చార్ట్‌బస్టర్ హిట్ అయ్యాయి. ఈ సినిమా మార్చి 28న థియేటర్ల ద్వారా ప్రేక్షకుల ముందుకు వస్తోంది. ఈ సందర్భంగా హీరోయిన్ శ్రీలీల తాజాగా విలేకరులతో ఈ సినిమా విశేషాలను పంచుకుంది.

‘రాబిన్‌హుడ్’లో మీ క్యారెక్టర్ ఎలా ఉండబోతోంది.? 

-ఇందులో నా పాత్ర పేరు నీరా వాసుదేవ్. ఫారిన్ నుంచి ఇండియా వచ్చిన అమ్మాయిగా కనిపిస్తాను. నీరా ఎప్పుడూ తన సొంత ప్రపంచంలోనే ఉంటుంది. ఈ ప్రపంచమంతా తన చుట్టూనే తిరుగుతుందని అనుకుంటుంది. ఈ క్యారెక్టర్ చాలా క్యూట్ అండ్ బబ్లీగా ఉంటుంది. తప్పకుండా మీ అందరికీ నచ్చుతుంది.

మొదట ఈ సినిమాకు రష్మిక అనుకున్నారు కదా.. తర్వాత మీరెలా ఈ ప్రాజెక్టులోకి వచ్చారు.? 

-వరుస రిలీజ్‌ల తర్వాత నా ఎడ్యుకేషన్ కోసం కొంత గ్యాప్ తీసుకోవాలని అనుకున్నా. అలాంటి సమయంలో డైరెక్టర్ వెంకి కాల్ చేశారు. నిజానికి రష్మికకు చాలా నచ్చిన క్యారెక్టర్ ఇది. డేట్స్ కుదరకపోవడం వల్ల చేయలేకపోయారు. ‘పుష్ప’ షూటింగ్‌లో నేను తనను కలిసినప్పుడు ఆమె నాకు ఆల్ ది బెస్ట్ చెప్పారు. నాక్కూడా చాలా నచ్చిందీ క్యారెక్టర్ అందుకే డేట్స్ సెట్ చేసుకొని చేశాను.  

నితిన్‌తో రెండోసారి కలిసి పనిచేయడం ఎలా అనిపించింది..?

-నితిన్‌తో పనిచేయడం చాలా సౌకర్యంగా, ప్రశాంతంగా ఉంటుంది. ఆయన ఓ కుటుంబ సభ్యుడిలాగానే మసులుకుంటారు. సినిమాపై టీమ్ అంతా చాలా  నమ్మకంగా ఉన్నాం. మాకు చాలా టైమ్ దొరికింది. అద్భుతమైన క్వాలిటీతో ఈ చిత్రాన్ని సినీప్రియుల ముసుకు తీసుకొస్తున్నాం. సినిమాను ప్రేక్షకులు బాగా ఆదరిస్తారనే నమ్మకం ఉంది. ఈ సినిమాతో నితిన్, నేను హిట్ పెయిర్ అనే పేరు తెచ్చుకుంటామని భావిస్తున్నా. 

సినిమాలో వెన్నెల కిషోర్, రాజేంద్రప్రసాద్ ట్రాక్ గురించి చెప్తారా? 

-వెన్నెల కిషోర్, రాజేంద్రప్రసాద్ ట్రాక్ షూట్ చేస్తున్నప్పుడే పడీపడీ నవ్వాం. ముఖ్యంగా వెన్నెల కిషోర్ కామెడీని చాలా ఎంజాయ్ చేశాను. మా ఇద్దరి మధ్య వచ్చే సీన్స్ కూడా హిలేరియస్‌గా ఉంటాయి. మొన్న సినిమా చూసినప్పుడు కూడా విపరీతంగా ఎంజాయ్ చేశాం. రాజేంద్రప్రసాద్ గురించి మనం చెప్పాల్సిన అవసరం లేదు. ఇందులో ఆయన కామెడీ అదిరిపోతుంది. ఇంత వినోదభరితమైన సినిమాను నా కెరీర్‌లో ఇప్పటివరకు చేయలేదు. నా కెరీర్‌లో కంప్లీట్ ఫన్ ఎంటర్‌టైనర్‌గా నిలిచే సినిమా ఇది.

మైత్రి మూవీ మేకర్స్ గురించి..? 

-నేను మైత్రి ఫ్యామిలీలో ఉన్నానని చెప్పుకోవడం చాలా గర్వంగా ఉంటుంది. వారి బ్యానర్‌లో నటించడం చాలా ఆనందంగా ఉంది. చాలా మంచి ప్రొడ్యూసర్స్. చాలా కంఫర్టబుల్‌గా చూసుకుంటారు.. ఇంట్లో సినిమా చేస్తే ఎలా ఉంటుందో అంత హ్యాపీగా ఉంటుంది. 

వరుసగా సినిమాలు చేస్తున్న మీరు.. ఒక ఏడాది గ్యాప్ ఇవ్వడానికి కారణమేంటి?

గత సంవత్సరం నా నుంచి కంటిన్యూస్‌గా దాదాపు ప్రతి నెలకు ఒక రిలీజ్ ఉండేది. ఒక్కో రోజు 4, 5 షిఫ్ట్లులు పనిచేశాను. అలా ప్లాన్ చేయడానికి కూడా కారణం ఎడ్యుకేషన్‌లో ఫైనల్ ఇయర్‌లో ఉండటమే. ఆ గ్యాప్‌ని ఫిల్ చేయడానికి అలా ప్లాన్ చేశాను. ఒక ఏడాది బ్రేక్ తీసుకుంటానని నాకు ముందు నుంచే అంచనా ఉంది. అయితే ఈ గ్యాప్‌లో చాలా మంచి సినిమాలు చేయలేకపోయా. చాలా సినిమాలు వదులుకున్నా. ఇప్పుడు మెడిసిన్ పూర్తయింది. అయితే కాలేజీలో కొన్ని రూల్స్ ఉంటాయి. దానికి తగ్గట్టుగా అటెండ్ అవుతున్నా.  

‘భగవంత్ కేసరి’ తర్వాత మీరు చేసే పాత్రలో చాలా మార్పులు ఉంటాయని భావించాం? భవిష్యత్తులో అలాంటి క్యారెక్టర్స్ చేస్తారా?

కచ్చితంగా. నేను చేసిన సినిమాల్లో క్యారెక్టర్ గుర్తుపెట్టుకోవడం చాలా అరుదు. కానీ ‘భగవంత్ కేసరి’ తర్వాత అందరూ విజ్జి పాప అని పిలవడం మొదలుపెట్టారు. ఎక్కడికి వెళ్లినా ఆ స్పందన రావడం అద్భుతంగా అనిపించింది. అలా క్యారెక్టర్ పేరు గుర్తుపెట్టుకునే సినిమాలు చేయాలనే ఉంది. కమర్షియల్ ఎంటర్‌టైనర్ సినిమాలు చేస్తూనే అలాంటి మంచి మెసేజ్ ఉన్న పాత్రలు, సినిమాలు చేయాలని భావిస్తున్నా.

మీరు బాలీవుడ్‌లో కనిపించిన ప్రతిసారి మీరు అక్కడికి షిఫ్ట్ అయిపోతున్నారేమో అని అభిప్రాయాలు వ్యక్తమవుతున్నాయి.. దీనికి మీరేమంటారు?

-తెలుగు ఇండస్ట్రీ నా ఇల్లు. బాలీవుడ్‌కు వెళ్లిపోవడం ఎప్పటికీ జరగదు. అది అసాధ్యం. 

చివరగా కొత్తగా చేస్తున్న సినిమాలేంటో కొంచెం చెప్తారా? 

‘-పరాశక్తి’ సినిమా చేస్తున్నా. రవితేజతో ‘మాస్ జాతర’ చేస్తున్నా. కన్నడ, -తెలుగులో జూనియర్ సినిమా చేస్తున్నా. ఇంకొన్ని సినిమాలూ ఉన్నాయి. వాటిని మేకర్స్ అనౌన్స్ చేస్తారు.