ఒక్క  అంశం ఆధారంగా కెరీర్‌ను నిర్ణయించలేమని సమంత అన్నారు. తాజాగా కోలీవుడ్‌లో నిర్వహించిన గోల్డెన్ క్వీన్ అవార్డ్స్‌లో సమంత గోల్డెన్ క్వీన్‌గా పురస్కారాన్ని తీసుకున్నారు. ఈ సందర్భంగా ఆమె తన కెరీర్ గురించి ఆసక్తికర వ్యాఖ్యలు చేశారు. అలాగే దర్శకుడు, నటుడు రాహుల్ రవీంద్రన్‌తో తన అనుబంధాన్ని పంచుకున్నారు. ‘నాకు ఆరోగ్యం బాగాలేనప్పుడు రాహుల్ నావెంటే ఉన్నాడు.

ఉదయం నుంచి సాయంత్రం వరకూ నాతోనే ఉంటూ జాగ్రత్తగా చూసుకున్నాడు. మా అనుబంధానికి పేరు పెట్టలేను.. నా స్నేహితుడు, సోదరుడు, కుటుంబసభ్యుడు, రక్తసంబంధీకుడా అని చెప్పలేను. అలాగే ఇంత మంది అభిమానులను సొంతం చేసుకోవడం నా అదృష్టం. లక్‌తో పాటు నేను పడిన కష్టమే ఈరోజు ఇంత మంది అభిమానానికి కారణం. మనం తీసుకునే నిర్ణయం ఒక్క అంశాన్ని దృష్టిలో ఉంచుకొని కెరీర్ ఎలా ఉంటుందో చెప్పలేం.

ఒకవేళ ఎవరైనా అలా డిసైడ్ చేస్తే అది అబద్ధమే అవుతుంది. తెలిసీ తెలియక తీసుకున్న ఎన్నో నిర్ణయాలు కెరీర్‌పై ప్రభావం చూపుతాయి’ అన్నారు. దర్శకురాలు సుధ కొంగర మాట్లాడుతూ.. “సమంతకు నేను అభిమానిని. ఐదేళ్లుగా ఆమెను దగ్గర నుంచి చూస్తున్నాను. ఆమె బాధ పడినప్పుడు నాకు కన్నీళ్లు వచ్చేవి. సమంతను చూసి ఎంతో మంది అమ్మాయిలు ధైర్యం తెచ్చుకోవాలి.

ఆమెతో సినిమా తీయాలని రెండు సార్లు ప్రయత్నించాను. కానీ, కుదరలేదు. ఎప్పటికైనా సమంతతో కచ్చితంగా సినిమా తీస్తాను” అని చెప్పారు. ఈ మాటలకు సమంత స్పంది స్తూ.. తనకు యాక్షన్ ఫిల్మ్ చేయాలనుందని చెప్పారు. దీనికి సుధ స్పందిస్తూ కచ్చితంగా యాక్షన్ ఫిల్మ్ చేద్దామని చెప్పారు.