calender_icon.png 4 April, 2025 | 1:27 PM

  • top-fb.png
  • top-tw.png
  • top-insta.png
  • top-yt.png

కోవిడ్ తర్వాత సినిమాల్లో హింస పెరిగింది: హీరో నవీన్‌చంద్ర

03-04-2025 06:41:38 PM

హీరో నవీన్‌చంద్ర నటించిన కొత్త సినిమా ‘28డిగ్రీ సెల్సియస్’. ఈ చిత్రాన్ని ఎమోషనల్ థ్రిల్లర్ లవ్‌స్టోరీగా రూపొందించారు ‘పొలిమేర’ ఫేమ్ డైరెక్టర్ డాక్టర్ అనిల్ విశ్వనాథ్. వీరాంజనేయ ప్రొడక్షన్స్ బ్యానర్‌పై సాయిఅభిషేక్ నిర్మిస్తున్నారు. షాలినీ వడ్నికట్టి హీరోయిన్‌గా నటించింది. ఈ నెల 4న థియేటర్ల ద్వారా విడుదలవుతోందీ సినిమా. ఈ సందర్భంగా ఏర్పాటుచేసిన ఇంటర్వ్యూలో హీరో నవీన్‌చంద్ర చిత్ర విశేషాలను పంచుకున్నారు. ఆ విశేషాలు ఆయన మాటల్లోనే.. 

ఆరేళ్ల క్రితం ఈ మూవీ జర్నీ ప్రారంభమైంది. డైరెక్టర్ అనిల్ విశ్వనాథ్ చెప్పిన కథ చాలా యూనిక్‌గా అనిపించింది. 28 డిగ్రీల టెంపరేచర్‌లో తన జీవిత భాగస్వామిని కాపాడుకునే వ్యక్తి కథ ఇది. ఈ క్రమంలో ఆ జంట చేసిన ఎమోషనల్ జర్నీ థ్రిల్లింగ్ ఎలిమెంట్స్‌తో ఆసక్తికరంగా సాగుతుంది. 

ఈ సినిమా రెండు ప్రాంతాల్లో జరుగుతుంది. ఒకటి వైజాగ్, రెండోది జార్జియా. ఫస్ట్ అమెరికా అనుకున్నాం కానీ, అప్పుడు విదేశీ నటీనటులకు ప్రవేశం కష్టంగా ఉండేది. జార్జియా వెళ్లినప్పుడు కూడా రెండుసార్లు అనుమతి లభించక వెనక్కి వచ్చాం. తర్వాత స్థానికంగా ఈ వార్త బాగా ప్రచారం కావడంతో మళ్లీ చిత్రీకరణకు అనుమతిచ్చారు.

మన కుటుంబ సభ్యుల్లో ఎవరికైనా సమస్య ఉంటే మనం ఎంతో జాగ్రత్తగా చూసుకుంటాం. అప్పుడు కష్టం కూడా ఇష్టంగా మారుతుంది. మెడికల్ కాలేజ్ స్టూడెంట్స్ అయిన కార్తీక్, అంజలి ప్రేమించుకుని పెళ్లి చేసుకుంటారు. వాళ్లిద్దరు డాక్టర్స్‌గా స్థిరపడతారు. అయితే అంజలికి అనారోగ్య సమస్య వల్ల ఆమెను 28 డిగ్రీ టెంపరేచర్‌లోనే చూసుకోవాలి. ఇలా నిజంగా ఎవరికీ జరగదు. పుస్తకాల్లో ఉన్న ఒక థియరీని తీసుకుని దాన్ని సినిమాటిక్‌గా మలిచారు మా డైరక్టర్. డాక్టర్ కాబట్టి అనిల్ విశ్వనాథ్ సినిమాలో మెడికల్ టర్మ్స్ చాలా వివరంగా రాశారు.

ఏ హీరోకైనా సక్సెస్, ఒక మార్కెట్ ఉండాలి. లేకుంటా ఆయన సినిమాల రిలీజ్‌లకు ఇబ్బందులు తప్పవు. ఆ టైమ్‌లో నా మూవీస్ కొన్ని ఆడకపోవడం వల్ల ఈ సినిమాకు బిజినెస్ జరగలేదు. అప్పటికి థ్రిల్లర్ జానర్ మూవీస్ ఇంతగా లేవు. ఇది లవ్ అండ్ థ్రిల్లర్ కాబట్టి సినిమా ఎవరికి చూపించినా కొన్ని ఛేంజెస్ చెప్పేవారు. సినిమాలో అది మార్చు ఇది మార్చు అని డైరెక్టర్‌ను చాలా ఇబ్బందిపెట్టారు. ఓటీటీల్లో కూడా సరైన ఆఫర్స్ రాలేదు. పైగా మా చిత్రాన్ని థియేటర్లలో రిలీజ్ చేయాలనే పట్టుదల మా డైరెక్టర్ అనిల్, ప్రొడ్యూసర్ సాయి అభిషేక్‌లలో ఉండేది. పొలిమేర సక్సెస్ తర్వాత ప్రొడ్యూసర్, డిస్ట్రిబ్యూటర్ వంశీ నందిపాటి చూసి ఇంత మంచి ఎమోషన్, డ్రామా ఉన్న సినిమాను ఎందుకు రిలీజ్ చేయలేదు, నేను రిలీజ్ చేస్తా అని ముందుకొచ్చారు. ఈ సినిమా థియేటర్‌లోనే కాదు రేపు టీవీ, ఓటీటీ ఏ ప్లాట్‌ఫాంలో రిలీజైనా ప్రేక్షకులు ఆదరిస్తారనే నమ్మకం ఉంది. మంచి ఓపెనింగ్స్ వచ్చి, ఆడియెన్స్ మౌత్ టాక్ తో థియేటర్లలో మూవీ ఆదరణ పొందుతుందని ఆశిస్తున్నాం. నా క్యారెక్టర్ వరకు ఎంత బాగా పర్‌ఫార్మ్ చేయాలో అంత చేశా.

కోవిడ్ తర్వాత థ్రిల్లర్స్, యాక్షన్ మూవీస్ ఎక్కువయ్యాయి. సినిమాల్లో హింస పెరిగింది. సొసైటీలో కూడా హింస పెరిగింది. ఎక్కడ చూసినా క్రైమ్ న్యూస్ వింటూనే ఉన్నాం. సినిమాల్లోనూ అలాంటి క్రైమ్స్ చూసేందుకు ప్రేక్షకులు ఆసక్తి చూపిస్తున్నారు. నేను హీరోగా చేసే సినిమాలకు ప్రొడక్షన్ వైపు బలంగా ఉన్నారా.. లేదా? అని చూసుకుంటున్నా. క్యారెక్టర్స్ చేస్తే అది లైఫ్ లీడ్ చేయడానికి, కొంత డబ్బు సంపాదించడానికి, నా క్రాఫ్ట్‌ను కెరీర్‌ను లైఫ్‌ను బ్యాలెన్స్ చేసుకుంటూ చేస్తున్నా. 

‘అరవింద సమేత’, ‘వీర రాఘవ’లో నేను చేసిన పాత్రలకు చాలా మంచి పేరొచ్చింది. నా కెరీర్‌కు టర్నింగ్ పాయింట్ అయ్యింది. ఇప్పుడు అదే బ్యానర్‌లో రవితేజ హీరోగా నటిస్తున్న ‘మాస్ జాతర’ చిత్రంలో ఓ సరికొత్త పాత్రలో నన్ను చూస్తారు. నేను ‘గేమ్‌ఛేంజర్’లో ఉండిపోవడం వల్ల సూర్య రెట్రో సినిమాలో మెయిన్ విలన్‌గా నటించే అవకాశం కోల్పోయాను. ఇప్పుడు ఏకే ఎంటర్‌టైన్‌మెంట్స్‌లో ‘షో టైమ్’ చిత్రంతోపాటు ‘11’ అనే మరో సినిమా ఉంది. నాకు బాగా పేరు తెచ్చిన ఇన్‌స్పెక్టర్ రిషి వెబ్‌సిరీస్ సీజన్ 2 రాబోతోంది.