బొగ్గు లారీలను నిలిపి గ్రామస్థుల నిరసన  

ఇల్లెందు, నవంబర్ 17: భద్రాద్రి కొత్తగూ డెం జిల్లా  ఇల్లెందు నియోజకవర్గ పరిధిలోని టేకులపల్లి మండలం సింగరేణి కోయ గూడెం ఉపరితల గనికి వెళ్లే వాహనాలతో ఎగిసిపడుతున్న దుమ్ముతో అనారోగ్యం పాలై ఆస్పత్రుల్లో చేరుతున్నామంటూ దాసుతండా గ్రామస్థులు ఆదివారం ఆందోళనకు దిగారు.

టేకులపల్లి బోడు రోడ్డు కూడలి నుంచి దాసుతండా వరకు రహదారిని విస్తరించి డివైడర్, సెంటర్ లైటింగ్ ఏర్పాటుకు గత ప్రభుత్వ హయాంలో పనులు చేపట్టారు. మొదట అర కిలోమీటర్ వరకు పూర్తి చేశారు. మిగతా అర కిలోమీటర్ పనులు చేపట్టి రోడ్డును తవ్వి పనులు వదిలేశారు.

అప్పటి నుంచి రేగులతండా, దాసుతండా వాసులకు ఇబ్బందులు మొదలయ్యాయి. వాహనాల రాకపోకలతో ఎగిసిపడే దుమ్ము తో నానాయాతన పడుతున్నారు. ఆందోళన చేపడితే సింగరేణి అధికారులు రోజుకు మూడుసారుల నీళ్లు పోయించేందుకు ఒప్పుకున్నారు. కానీ నీరు పోయకపోవడంతో రోడ్డు నిర్మాణం చేపట్టాలని ఆదివారం ఆందోళన చేశారు.