మంచు కుటుంబం నుంచి మరో తరం తెరపై సందడి చేసేందుకు సిద్ధమైన సంగతి తెలిసిందే. ‘కన్నప్ప’ చిత్రంలో హీరో మంచు విష్ణు కుమారుడు అవ్రామ్.. ఓ కీలక పాత్రలో నటిస్తున్నట్టు మేకర్స్ గతంలో ప్రకటించారు. తాజాగా సోమవారం కృష్ణాష్టమి సందర్భంగా అవ్రామ్‌కు సంబంధించి ‘తిన్నడు’ పాత్ర లుక్‌ను విడుదల చేశారు. అందరికీ గోకులాష్టమి శుభాకాంక్షలు తెలుపుతూ మోహన్ బాబు సోషల్ మీడియాలో ఈ పోస్టర్లను పోస్ట్ చేశారు. అవ్రామ్‌కు ఇది తొలి సినిమా కావటంతో వీటిని చూసేందుకు నెటిజన్లు ఆసక్తి కనబరుస్తున్నారు. మంచు విష్ణు టైటిల్ రోల్ పోషిస్తున్న పాన్ ఇండియా చిత్రమే ‘కన్నప్ప’. ముఖేశ్ సింగ్ దర్శకత్వంలో మోహన్ బాబు దీన్ని నిర్మిస్తున్నారు.

ప్రీతి ముకుందన్ కథానాయికగా నటిస్తున్న ఈ చిత్రంలో ప్రభాస్, అక్షయ్ కుమార్, శరత్‌కుమార్, మోహన్ లాల్ తదితరులు ముఖ్య పాత్రల్లో కనిపించనున్నారు. చిత్రీకరణ దాదాపుగా పూర్తి చేసుకున్న ఈ సినిమాకు సంబంధించి టీజర్ ఇటీవల విడుదల కాగా, ప్రేక్షకాదరణ పొందింది. ఈ సినిమా గురించి విష్ణు ఓ సందర్భంలో మాట్లాడుతూ.. “ఇది నా కలల సినిమా. నా బిడ్డతో సమానం. ఒక నటుడిగా ఈ చిత్రం నాకు గౌరవాన్ని పెంచుతుంది. కెరీర్ పరంగా నా జీవితాన్ని మార్చివేస్తుంది. చాలా మంది అగ్ర నటులతో కలిసి ఇందులో నటించటం నాకు దక్కిన అదృష్టంగా భావిస్తున్నా” అన్నారు.