తమిళంలో 2023న విడుదలై ప్రేక్షకాదరణ పొందిన ‘బంపర్’ చిత్రం తెలుగులో రాబోతోంది. ఈ సినిమా టైటిల్ కేరళ లాటరీ నేపథ్యంగా రూపొందింది. ఇందులో వెట్రి, శివాని నారాయణన్ ప్రధాన పాత్రలు పోషించగా, హరీశ్ పేరడి, జీపీ ముత్తు, తంగదురై, కవితా భారతి సహాయక పాత్రలు పోషించారు. సెల్వకుమార్ రచన, దర్శకత్వం వహించిన ఈ థ్రిల్లర్ ఎంటర్‌టైనర్ చిత్రం తెలుగు ట్రైలర్, టీజర్ ఆవిష్కరణ కార్యక్రమాన్ని చిత్ర యూనిట్ హైదరాబాద్‌లో శనివారం నిర్వహించింది.

ఈ చిత్ర ట్రైలర్ ఆసక్తికరంగా సాగింది. స్నేహితులతో కలిసి అయ్యప్ప మాల వేసుకుని కేరళ వెళ్లిన ఓ యువకుడు అక్కడ కొన్న లాటరీ టిక్కెట్‌కు ప్రైజ్ మనీ వస్తుంది. దాన్ని చేజిక్కించుకునేందుకు అతను పడ్డ కష్టాలు, స్నేహితులతో ఇబ్బందులనే వినోదాత్మకంగా చూపిస్తూ ఓ థ్రిల్లర్ అంశాన్ని జోడించిన తీరు మెప్పించింది. ఈ చిత్రం తెలుగు వెర్షన్‌ను సెప్టెంబర్‌లో విడుదల చేయనున్నామని మూవీ యూనిట్ పేర్కొంది.