పోర్ట్‌లాండ్ (అమెరికా): భారత అథ్లెట్ గుల్వీర్ సింగ్ 5000 మీటర్ల రేస్‌లో జాతీయ రికార్డు నెలకొల్పాడు. పోర్ట్‌లాండ్ ట్రాక్ ఫెస్టివల్ మీట్‌లో గుల్వీర్ రేసును 13 నిమిషాల 18.92 సెకన్లలో పూర్తి చేసి రెండో స్థానంలో నిలిచాడు. గతంలో అవినాష్ సబ్లే పేరిట ఉన్న రికార్డును తాజాగా గుల్వీర్ బద్దలు కొట్టాడు. గతేడాది లాస్ ఏంజిల్స్ ట్రాక్ మీట్‌లో అవినాష్ 5000 మీటర్ల రేసును 13 నిమిషాల19.30 సెకన్లలో పూర్తి చేశాడు. తాజా ప్రదర్శనతో గుల్వీర్ సింగ్ 10 వేల మీటర్లు, 5 వేల మీటర్ల రేసులో జాతీయ రికార్డును తన పేరిట లిఖించుకున్నాడు. అమెరికా అథ్లెట్ డిలన్ జాకబ్స్ (13:18.18 సెకన్లలో) అగ్రస్థానంలో నిలిచాడు.