* ఆధునిక సాంకేతిక ప్రపంచానికి మీరే వెన్నుముక: కేటీఆర్

హైదరాబాద్, జనవరి 23 (విజయక్రాం తి): ప్రపంచవ్యాప్తంగా ఉన్న ఐటీ ఉద్యోగులు ఎంతో కష్టపడి వారి జీవనోపాధిని పొందుతున్నారని, ఐటీ సంస్థల్లో ఉన్న అక్కాచెల్లెళ్లకు, అన్నాదమ్ముళ్లలకు సలాం చేస్తున్నట్టు బీఆర్‌ఎస్ వర్కింగ్ ప్రెసిడెంట్ కేటీఆర్ పేర్కొన్నారు.

తనను ఒక ఐటీ ఉద్యోగి అంటూ తక్కువ చేసి మాటాడొచ్చని అనుకునే వారికి ఒకటే చెప్పదలుచుకున్నానని ఎక్స్ వేదికగా గురువారం స్పందించారు. ఐటీ పరిశ్రమలలో రాణించాలంటే నిజమైన ప్రతిభ, విద్య, అంకితభావం అనేవి చాలా అవసరమని, మీ మేధస్సు, అవిశ్రాంత శ్రమే ఆధునిక సాంకేతిక ప్రపంచానికి వెన్నుముకన్నారు. ‘

మీరు లేకుంటే ప్రగతి రథచక్రాలు ఆగిపోతాయి’ అన్నారు. ఐటీ పరిశ్రమలో ఉండాలంటే అంకితభావం చాలా అవసరమని, కానీ, సంచుల కొద్ది డబ్బులతో ఎమ్మెల్యేలను కొనడానికి, ఢిల్లీ బాసులకు డబ్బులు పంపడానికి ఇవేమీ అవసరంలేదన్నారు. మీ విద్యార్హతలకు, మీ నిబద్ధతకు కొందరు యాక్సిడెంటల్ రాజకీయ నాయకులు సరితూగరని, అలాంటి వాళ్లు ప్రవేశపెట్టే అనాలోచిత విధానాలకు మనం భారీ మూల్యం చెల్లించుకుంటున్నామని పేర్కొన్నారు.

‘నా విద్యార్హతలు, నా ఉద్యోగ అనుభవం, ఐటీలో నా నేపథ్యం, ముఖ్యంగా ఐటీ రంగంలో ఉన్న ఉద్యోగులు నాకు ఎప్పటికీ గర్వకారణం’ అని పోస్ట్ చేశారు.