ఏపీ హైకోర్టులో సినీ దర్శకుడు రాంగోపాల్ వర్మ పిటిషన్  

విజయవాడ, నవంబర్ 19 (విజయక్రాంతి): ప్రకాశం జిల్లా మద్దిపాడు పోలీసులు పెట్టిన కేసులో తనకు ముందస్తు బెయిల్ మంజూరు చేయాలని సినీ దర్శకుడు రాంగోపాల్ వర్మ మంగళవారం ఏపీ హైకోర్టును ఆశ్రయించారు. హైకోర్టు తుది ఉత్తర్వులు జారీ చేసే వరకు ముందస్తు బెయిల్ మంజూరు ఉత్తర్వులు ఇవ్వాలని పిటిషన్ దాఖలు చేశారు.

గత మార్చిలో వ్యూహం సినిమా రిలీజ్ నేపథ్యంలో ఆ సినిమా పోస్టర్‌ను సామాజిక మాధ్యమంలో పోస్ట్ చేశారు. ఇది చంద్రబాబు, పవన్ కల్యాణ్, లోకేష్‌ను కించపర్చేలా ఉందంటూ ప్రకాశం జిల్లా మద్దిపాడు మండలం గార్లపాడుకి చెందిన ముత్తనపల్లి రామలింగయ్య చేసిన ఫిర్యాదు ఆధారంగా పోలీసులు కేసు నమోదు చేశారు.

రాజకీయ దురుద్దేశాలతో నమోదైన ఈ కేసులో తనకు ముందస్తు బెయిల్ ఇవ్వాలని పిటిషన్‌లో కోరారు. ఎవరి పరువు ప్రతిష్ఠ దెబ్బతినేలా తాను పోస్టులు పెట్టలేదని చెప్పారు. తనను పోలీసులు అరెస్ట్ చేసి థర్డ్ డిగ్రీ ప్రయోగించే అవకాశం ఉన్నందున ముందస్తు బెయిల్ మంజూరు చేయాలని కోరారు. ఈ పిటిషన్‌పై హైకోర్టు విచారణ చేయనుంది.