కామారెడ్డి (విజయక్రాంతి): కామారెడ్డి ఆర్కిడ్స్ పాఠశాలలో ఇంగ్లీష్ ఫెయిర్ ఉత్సవాలను విజయవంతంగా నిర్వహించారు. గురువారం ఈ కార్యక్రమం విద్యార్థులకు ఆంగ్లభాషా నైపుణ్యాలను మెరుగుపరచడానికి ఒక ఉత్తేజకరమైన వేదికను ఏర్పాటు చేశారు. విద్యార్థులు వివిధ ఆసక్తికరమైన కార్యకలాపాల ద్వారా తమ సృజనాత్మకతను, భాషా సామర్థ్యాలను ప్రదర్శించారు. విద్యార్థులు నాటకాలు, స్క్రిప్టెడ్ ప్లేస్, స్కై డ్రాప్, ఫోనేటిక్ సౌండ్స్ డెమోన్‌స్ట్రేషన్ లతో ప్రేక్షకులను ఆకట్టుకున్నారు. అలాగే ట్రాఫిక్ రూల్స్, వృత్తులు, రైల్వే స్టేషన్ కమ్యూనికేషన్, గ్రీన్ లీఫ్ మార్కెట్, ఫ్రెష్ ఫ్రూట్ మార్కెట్ వంటి నిజజీవిత సంభాషణల ద్వారా భాషను వినూత్నంగా అభ్యసించారు.

జంతువులు, వాటి పిల్లల మాదిరిగా నటించడం విద్యార్థులకు వినోదాత్మకంగా మారింది. ఇంగ్లీష్ సంభాషణలకు సంబంధించి ఫుడ్ ఫెస్ట్ నిర్వహించారు. విద్యార్థులు ఆహార పదజాలాన్ని, భిన్న సంస్కృతుల గురించి నేర్చుకునే అవకాశాన్ని పొందారు. సుమారు 500 మంది తల్లిదండ్రులు ఈ కార్యక్రమాన్ని వీక్షించారు. ఆర్కిడ్స్ పాఠశాల తలపెట్టిన వినూత్న ప్రయత్నాన్ని వారు అభినందించారు. ఈ సందర్భంగా పాఠశాల ప్రిన్సిపాల్, ఛైర్మన్ Ch. గోవర్ధన్ రెడ్డి మాట్లాడుతూ... ఈ ఇంగ్లీష్ ఫెయిర్ ప్రధాన ఉద్దేశ్యం విద్యార్థుల ఆంగ్ల కమ్యూనికేషన్ నైపుణ్యాలను, సమర్థమైన ప్రజాసంభాషణ సామర్థ్యాలను అభివృద్ధి చేయడమే అని తెలిపారు. 

ఈ కార్యక్రమంలో కరెస్పాండెంట్ RK గ్రూప్ ఆఫ్ ఇన్స్టిట్యూట్ సిఈఓ డా. ముస్కు జైపాల్ రెడ్డి, డైరెక్టర్ మర్రి సదాశివ రెడ్డి ,వైస్ ప్రిన్సిపాల్ మర్రి భూలక్ష్మి, అకాడమిక్ ఇంచార్జి వసంత, అధ్యాపక బృందం చురుకుగా పాల్గొని విద్యార్థులను ప్రోత్సహించారు. ఈ కార్యక్రమానికి విద్యార్థులు, తల్లిదండ్రులు పెద్దఎత్తున హాజరై భాషా అభ్యాసాన్ని ఆనందదాయకంగా మార్చే ఇలాంటి కార్యక్రమాలు ఎంతో ప్రయోజనకరంగా ఉంటాయని అన్నారు. ఈ ఇంగ్లీష్ ఫెయిర్‌ను విజయవంతం చేసిన ప్రతి ఒక్కరికీ పాఠశాల యాజమాన్యం హృదయపూర్వక కృతజ్ఞతలు తెలిపారు. ఈ కార్యక్రమంలో విద్యార్థులతో పాటు విద్యార్థుల తల్లిదండ్రులు పాల్గొన్నారు.