హైదరాబాద్: గోషామహల్ వద్ద నాలా రోడ్డు కుంగింది. దారుస్సలామ్- చాక్నావాడికి రోడ్డులో ప్లైవుడ్ దుకాణాల వద్ద నాలా కుంగింది. రాత్రి 2 గంటల సమయంలో ఈ ఘటన జరగడంతో ప్రమాదం తప్పింది. ఈ ఘటనతో ప్రయాణికులు భయాందోళనకు గురయ్యారు. కుంగిన నాలా రోడ్డును చూసేందుకుపెద్ద ఎత్తున జనం గుమిగూడడంతో పోలీసులు కూడా అక్కడికి చేరుకున్నారు. గతంలోనూ ఇదే నాలా 200 మీటర్ల దూరంలో కుంగిందని స్థానికులు తెలిపారు. స్థానికుల సమాచారంతో గ్రేటర్ హైదరాబాద్ మునిసిపల్ కార్పొరేషన్ (జిహెచ్‌ఎంసి) అధికారులు ఘటనాస్థలికి చేరుకుని పరిశీలిస్తున్నారు.

గతంలో కూడా గోషామహల్‌లోని చాక్నావాడి వద్ద రోడ్డు గుంతలు పడడంతో నాలా వెంబడి వ్యాపారులు, దుకాణదారులు, ప్రయాణికులు తీవ్ర ఉద్రిక్తతలకు గురయ్యారు. అందుబాటులో ఉన్న సమాచారం ప్రకారం కొంత మంది కూరగాయల వ్యాపారులు రోడ్డు పక్కనే తమ దుకాణాలు పెట్టి మార్కెట్‌ను ఏర్పాటు చేశారు. ఈ ఘటనలో కార్లు, ఆటోలు, బైక్‌లు ధ్వంసం కావడంతో పాటు మరికొంత మందికి గాయాలయ్యాయి. మళ్లీ ఇప్పుడు నాలా రోడ్డు కుంగడంతో స్థానికులు ఆందోళన చెందుతున్నారు.