ఇకపై రాత్రి 11.45 గంటల వరకు మెట్రో సేవలు

హైదరాబాద్ సిటీబ్యూరో, మే 17 (విజయక్రాంతి):  మెట్రో ప్రయాణికులకు ఎల్ అండ్ టీ గుడ్‌న్యూస్ చెప్పింది. మెట్రో రైలు సమయాన్ని పొడిగిస్తున్నట్లు తెలిపింది. తాజా నిర్ణయం మేరకు, హైదరాబాద్ మెట్రో రైలు సేవలు ఇప్పటి వరకు ఉదయం 6 గంటలకు ప్రారంభమై, రాత్రి 11 గంటల వరకు అందుబాటులో ఉండగా.. ఇక నుంచి 11.45 గంటల వరకు అందుబాటులో ఉండనున్నాయి. చివరి మెట్రో రైలు రాత్రి 11.45లకు ప్రారంభం కానుంది. ఈ మేరకు ఎల్ అండ్ టీ అధికారులు ఓ ప్రకటన విడుదల చేశారు. దీనితో పాటు ప్రతి సోమవారం ఉదయం గం.5.30 లకే మెట్రో రాకపోకలు ప్రారంభం కానున్నాయని స్పష్టం చేశారు. అయితే, మిగతా రోజుల్లో మాత్రం ఉదయం 6 గంటలకు మొదటి ట్రిప్ ప్రారంభం అవుతుందని వెల్లడించారు.