యంగ్ హీరో రాజ్‌తరుణ్ రాబోయే చిత్రం ‘భలే ఉన్నాడే’. రవికిరణ్ ఆర్ట్స్ బ్యానర్‌పై ఎన్‌వీ కిరణ్‌కుమార్ నిర్మిస్తున్న ఈ చిత్రానికి జె.శివసాయివర్ధన్ దర్శకత్వం వహిస్తున్నాడు. డైరెక్టర్ మారుతి సమర్పిస్తున్న ఈ చిత్రానికి సంబంధించి టీజర్, సాంగ్స్ ఇప్పటికే విడుదలై స్పందన చూరగొన్నాయి. తాజాగా మేకర్స్ ట్రైలర్ రిలీజ్ చేశారు. అమ్మాయిలంటే ఆమడ దూరంలో ఉండే హీరో పాత్రను పరిచయం చేస్తూ మొదలైన ట్రైలర్ ఆద్యంతం ఆకట్టుకుంది. రాజ్‌తరుణ్, మనీషా కంద్కూర్ మధ్య వచ్చే సన్నివేశాలు, వారి లవ్‌స్టొరీ చాలా వినోదాత్మకంగా ఉన్నాయి. భావోద్వేగాలు కూడా ట్రైలర్‌లో ఆకట్టుకున్నాయి.

ఒక యూనిక్ సబ్జెక్ట్‌ను ఎంచుకున్న డైరెక్టర్.. రాజ్‌తరుణ్‌ను కొత్తగా, ఉల్లాసవంతమైన పాత్రలో చూపించిన విధానం బాగుంది. రాజ్‌తరుణ్ నటనతో ఆకట్టుకుంటే, మనీషా గ్లామర్, నటనతో ఆకర్షిస్తోంది. వీటీవీ గణేశ్, హైపర్ ఆది, కృష్ణ భగవాన్, శ్రీకాంత్ అయ్యంగార్ పాత్రలు, వారి సన్నివేశాలు చూస్తుంటే సినిమాలో వినోదం పాళ్లు ఎక్కువగా ఉన్నట్టు అర్థమవుతోంది. నగేశ్ బనెల్లా కెమెరా పనితీరు, శేఖర్ చంద్ర నేపథ్య సంగీతం వినోదాన్ని రెట్టింపు చేశాయి. ఇంకా ఈ చిత్రంలో సింగీతం శ్రీనివాస్, అభిరామి, అమ్ము అభిరామి, లీలా శాంసన్, గోపరాజు రమణ, రాచా రవి, సుదర్శన్, శ్రీనివాస్ వడ్లమాని, మణి చందన, పటాస్ ప్రవీణ్ తదితరులు ముఖ్య తారాగణంగా ఉన్నారు. వినాయక చవితి సందర్భంగా సెప్టెంబర్ 7న ప్రపంచవ్యాప్తంగా విడుదల కానుందీ సినిమా.