నిర్మాణాలు కూల్చివేయించిన డీసీ

రాజేంద్రనగర్, ఆగస్టు 30: జీహెచ్‌ఎంసీ స్థలాన్ని ఆక్రమించి నిర్మాణాలు చేపట్టగా అధికారులు కూల్చివేశారు. రాజేంద్రనగర్ సర్కిల్ డిప్యూటీ కమిషనర్ రవికుమార్ తెలిపిన వివరాల ప్రకారం.. సర్కిల్ పరిధిలోని ఆప్కో కాలనీలోని సర్వే నంబర్ 156/1లో సుమారు 450 గజాల స్థలాన్ని కొందరు  ఆక్రమించుకొని అందులో నిర్మాణాలు చేపట్టారు.   విషయం తెలుసుకున్న సర్కిల్ డిప్యూటీ కమిషనర్ రవికుమార్ తన సిబ్బందిని అక్కడికి పంపించారు. నిర్మాణాలను నేలమట్టం చేయించారు. జీహెచ్‌ఎంసీ స్థలంలో ఎవరైనా నిర్మాణాలు చేపడితే కఠిన చర్యలు తీసుకుంటామని ఆయన హెచ్చరించారు. బాధ్యులపై పోలీసు కేసులు నమోదు చేయిస్తామని తెలిపారు. ప్రభుత్వ స్థలాలను కాపాడాల్సిన బాధ్యత అందరిపై ఉందని పేర్కొన్నారు.