జగిత్యాల లింగం పేట రైల్వే స్టేషన్

స్టేషన్ మాష్టర్ సమయ స్ఫూర్తితో తప్పిన పెనుముప్పు

జగిత్యాల, (విజయ క్రాంతి): జగిత్యాలలోని లింగంపేట రైల్వే స్టేషన్ లో ఆగి ఉన్న గూడ్స్ రైలులో అగ్ని ప్రమాదం సంభవించింది. వివరాల్లోకి వెళితే శనివారం సాయంత్రం దాదాపు 6 గంటల సమయంలో జగిత్యాలలోని లింగంపేట రైల్వేస్టేషన్ లో ఉన్న గూడ్స్ రైలులో  బొగ్గు వ్యాగన్ లో మంటలు ఒక్కసారిగా ఎగిసి పడటం గమనించి స్టేషన్ మాస్టర్  అగ్నిమాపక సిబ్బందికి సమాచారం అందించారు. వెంటనే అగ్నిమాపక సిబ్బంది అక్కడికి చేరుకొని మంటలు మరింత ఎగసి పడకుండా అదుపులోకి తెచ్చారు. అయినప్పటికీ దాదాపు రూ. 5 లక్షల వరకు నష్టం వాటిల్లినట్టు జగిత్యాల అగ్నిమాపక అధికారి ఏ. కృష్ణ కాంత్ తెలిపారు. ఎల్ఎఫ్ కే రవీందర్, ఆపరేటర్ ఏ. మల్లేశం, ఫైర్ మెన్ లు కే. నరేష్ , ఎం. కార్తీక్, జి. అరుణ్, జి. శ్రీనివాస్ అనే అగ్ని మాపక సిబ్బంది తదితరులు పాల్గొని మంటలు అదుపులోకి తీసుకుని వచ్చారు. కాగా స్టేషన్ మాష్టర్ సమయ స్ఫూర్తితోనే పెను ముప్పు తప్పినట్లు అగ్నిమాపక శాఖ అధికారులు, సిబ్బంది తెలిపారు.