షార్ట్ సర్క్యూట్‌తో చెలరేగిన మంటలు

శేరిలింగంపల్లి, నవంబర్ 23: మాదాపూర్ డివిజన్ పరిధి గోకుల్ ఫ్లాట్స్‌లో మంటలు చెలరేగాయి. స్థానికులు, పోలీసులు తెలిపిన ప్రకారం మియాపూర్ పీఎస్ పరిధిలోని గోకుల్ ఫ్లాట్స్ ఎస్‌అండ్‌ఎస్ హోమ్స్ ఫ్లాట్ నెంబర్స్ 367, 368లో శనివారం మధ్యాహ్నం షార్ట్ సర్క్యూట్ సంభవించింది. అపార్ట్‌మంట్‌లోని మొదటి అంతస్తులో ఒక్కసారిగా మంటలు చెలరేగడంతో చుట్టుపక్కల ఉన్నవారు భయభ్రాం తులకు గురయ్యారు.

సమాచారమందుకున్న ఫైర్ సేఫ్టీ అధికారులు.. ఘటనా స్థలానికి చేరుకొని ఫైర్ ఇంజన్‌తో మంటలను అదుపుచేశారు. ప్రమాద సమయంలో ఫ్లాట్స్‌లో చిక్కుకున్న ఇద్దరు వృద్ధులను ఫైర్ సేఫ్టీ సిబ్బంది సురక్షితంగా బయటకు తీసుకొచ్చారు. షార్ట్ సర్క్యూట్ ఎలా సంభవించిందనే కోణంలో పోలీసులు ఆరా తీస్తున్నారు.