విశ్వక్ సేన్ 13వ సినిమా ఎస్‌ఎల్‌వీ సినిమాస్ బ్యానర్‌లో వస్తోంది. శ్రీధర్ గంటా తొలిసారి రచన, దర్శకత్వం వహిస్తున్న ఈ సినిమాను సుధాకర్ చెరుకూరి నిర్మించనున్నారు. ఇంకా టైటిల్ ఖరారు కాని ఈ సినిమాకు ‘ఎవ్రీ యాక్షన్ ఫైర్స్ ఎ రియాక్షన్’ అనేది ట్యాగ్‌లైన్. మేకర్స్ ఈ చిత్రాన్ని ప్రకటిస్తూ విశ్వక్ పోలీస్ యూనిఫాంలో ఉన్న పోస్టర్‌ను ఇటీవల విడుదల చేశారు. తాజాగా గురువారం ఈ సినిమాను లాంఛనంగా ప్రారంభించారు. పూజా కార్యక్రమాల అనంతరం నిర్మాతలు నాగ వంశీ, సాహు గారపాటి స్క్రిప్ట్‌ను దర్శక నిర్మాతలకు అందజేశారు.

ముహూర్తం షాట్‌కు దర్శకుడు వశిష్ట క్లాప్‌నిచ్చారు. శ్రీకాంత్ ఓదెల కెమెరా స్విఛ్ ఆన్ చేశారు. ముహూర్తపు కార్యక్రమానికి మిగతా చిత్రబృందంతోపాటు హీరోయిన్‌గా నటిస్తున్న కన్నడ బ్యూటీ సంపద కూడా ఈ వేడుకకు హాజరైంది. రెగ్యులర్ షూటింగ్ సెప్టెంబర్ నుంచి ప్రారంభించనున్నట్టు మేకర్స్ వెల్లడించారు. ఈ మూవీలో విశ్వక్ సేన్ నిజాయితీపరుడైన ఐపీఎస్ ఆఫీసర్ పాత్రలో కనిపించనున్నారు. గ్రామీణ నేపథ్యంలో సాగే యూనిక్ పొలిటికల్ యాక్షన్ డ్రామాగా రూపొందనుందీ చిత్రం. దీనికి ‘తంగలాన్’ ఫేమ్ కిషోర్‌కుమార్ సినిమాటోగ్రఫీ అందిస్తుండగా, ‘కాంతార’ ఫేమ్ అజనీష్ లోక్‌నాథ్ సంగీతం సమకూర్చనున్నారు.