“సితార’లో నటించడం ద్వారా చక్కటి అనుభూతి పొందా. ఇందులో నేను వైవిధ్యమైన పాత్ర పోషించా. ఇందులో అనేక షేడ్స్ ఉన్నాయి.  నా క్యారెక్టర్ పేరు తార.. తను స్వతంత్య్ర భావాలున్న ఓ ఇంటీరియర్ డిజైనర్‌” అంటూ తన పాత్ర గురించి తెలిపింది కథానాయకి శోభిత ధూళిపాళ. ఈ అక్కినేని కొత్త కోడలు ఇంకా సినిమా గురించి చెప్తూ.. ‘నిజాయతీగా ఉండే ఓ అమ్మాయి తన జీవితంలో ఎదురైన సవాళ్లను ధైర్యంగా ఎలా ఎదుర్కొందనేదే కథ. చక్కటి ఫ్యామిలీ ఎమోషన్స్ ఆకట్టుకుంటాయి’ అని చెప్పుకొచ్చింది.

రాజీవ్ సిద్ధార్థ్‌తో కలిసి శోభిత నటించిన చిత్రం ‘లవ్, సితార’. కేరళ పచ్చటి అందాల నడుమ తెరకెక్కిన కథతో డైరెక్టర్ వందనా కటారియా తెరకెక్కించిన సినిమా ఇది. ఆర్‌ఎస్‌వీపీ నిర్మాణంలో రూపొంది ఈ చిత్రం సెప్టెంబర్ 27 నుంచి ఓటీటీ వేదిక జీ5లో స్ట్రీమింగ్ కానుంది. ఈ నేపథ్యంలో మేకర్స్ తాజాగా ట్రైలర్‌ను విడుదల చేసింది. తార (శోభిత) అంతర్జాతీయంగా పేరున్న చెఫ్ అర్జున్ (రాజీవ్ సిద్ధార్థ)తో ప్రేమలో పడుతుంది. ఈ జంట ప్రయాణం ఎటువైపు సాగిందనేదే సినిమా అని ట్రైలర్ చెప్తోంది.