మహారాష్ట్ర: పూణేలోని ఇంట్లో బుధవారం తెల్లవారుజామున గ్యాస్ సిలిండర్(Gas Cylinder Explosion) పేలి మంటలు చెలరేగడంతో ఒక వ్యక్తి, అతని కుమారుడు మృతి చెందారని అగ్నిమాపక అధికారులు తెలిపారు. మహారాష్ట్రలోని పూణే నగర శివార్లలోని వార్జే ప్రాంతంలో ఈ సంఘటన జరిగిందని వారు తెలిపారు. ఎల్‌పిజి (లిక్విఫైడ్ పెట్రోలియం గ్యాస్) సిలిండర్ పేలిన తర్వాత, మంటలు చెలరేగాయి. తరువాత దానిని అదుపులోకి తెచ్చామని అగ్నిమాపక అధికారి ఒకరు తెలిపారు. "మేము సంఘటనా స్థలానికి చేరుకున్నప్పుడు, సిలిండర్ పేలుడు కారణంగా ఇద్దరు వ్యక్తులు గాయపడ్డారు. వారిని ఆసుపత్రికి తరలించారు, అక్కడ వారు మరణించినట్లు వైద్యులు ప్రకటించారు" అని అగ్నిమాపక అధికారి చెప్పారు. మృతులను మోహన్ చవాన్, అతని కుమారుడు అతిష్ చవాన్‌గా గుర్తించినట్లు అధికారి తెలిపారు. రెస్టారెంట్‌లో పనిచేస్తున్న మోహన్ చవాన్ మరో కుమారుడు సంఘటన జరిగినప్పుడు ఇంట్లో లేడని ఆయన తెలిపారు.