1. రూ.50 వేలు అదనంగా  ఇవ్వాలన్న కానిస్టేబుల్?
2.  మనస్థాపంతో  ఆత్మహత్యాయత్నం

నాగర్‌కర్నూల్, నవంబర్ 27 (విజయక్రాంతి): పంట పొలానికి అడ్డుగా ఉన్నాయని హరితహారం మొక్కలను నరికిన రైతుకు పంచాయతీ కార్యదర్శి జరిమానా విధించారు. మనస్థాపం చెందిన రైతు ఆత్మహత్యాయత్నానికి పాల్పడిన ఘటన నాగర్‌కర్నూల్ జిల్లా లింగాల మండలం పద్మనపల్లి గ్రామంలో ఈ నెల 22న చోటుచేసుకుగా బుధవారం వెలుగులోకి వచ్చింది.

గ్రామానికి చెందిన రైతు శ్రీకాంత్‌రెడ్డి తనకున్న 16 ఎకరాల్లో వేరుశెనుగ పంటను సాగు చేశాడు. రోడ్డు పక్కనే ప్రభుత్వం హరితహారంలో భాగంగా మొక్కలు నాటింది. అవి ఏపుగా పెరిగి పొలానికి అడ్డుగా ఉన్నాయన్న ఉద్దేశంతో శ్రీకాంత్‌రెడ్డి ఈ నెల 18న 22 చెట్లను నరికివేశాడు. ఇది తెలుసుకున్న పంచాయతీ కార్యదర్శి భానుచందర్ రూ.8 వేలు జరిమానా విధిస్తూ రైతుకు నోటీసు జారీ చేశారు. దీంతో పాటు తనపై దుర్భాషలాడరన్న కారణంతో పోలీసులకు ఫిర్యాదు చేశారు.

పోలీస్ స్టేషన్‌లోని ఓ కానిస్టేబుల్ రైతుకు ఫోన్ చేసి ఏడేళ్ల జైలు శిక్ష తప్పకుండా అనుభవించాల్సిందేనని  బెయిల్ కూడా రాదని బెదిరించారు. లేదంటే జరిమానాతో పాటు మరో రూ.50 వేలు అదనంగా ఇవ్వాలని ఒత్తిడి తెచ్చారు. దీంతో కలత చెందిన శ్రీకాంత్‌రెడ్డి ఈ నెల 22న పురుగుల మందు తాగి ఆత్మహత్యాయత్నానికి పాల్పడ్డాడు. పరిస్థితి విషమించడంతో నాగర్‌కర్నూల్ జనరల్ ఆసుపత్రికి తరలించి చికిత్స అందిస్తున్నారు. కాగా దీనిపై పంచాయతీ కార్యదర్శి ఫిర్యాదు చేసింది నిజమేనని, పోలీస్ సిబ్బంది రైతును బెదిరించలేదని ఎస్సై వివరణ ఇచ్చారు.