హైదరాబాద్: మనిషికి చావు ఎప్పుడు.. ఏ విధంగా వస్తుందో ఎవరికీ తెలియదు. అలాంటి ఘటనే తాజాగా జగిత్యాల(Jagtial district )లో అడవి పంది బైక్‌ను ఢీకొట్టిన సంఘటనలో రైతు మృత్యువాతపడ్డాడు. మంగళవారం రాత్రి వెల్గటూర్ మండలం(Velgatoor Mandal ) కొండాపూర్‌లో రైతు సంగ శ్రీనివాస్ (46) తన వ్యవసాయ పొలాలకు నీరు సరఫరా చేసి ఇంటికి తిరిగి వస్తుండగా బైక్‌ను అడవిపంది వేగంగా దూసుకొచ్చి ఢీకొట్టింది. దీంతో బైకుపై నియంత్రణ కోల్పోయి శ్రీనివాస్ కిందపడిపోవడంతో తీవ్ర గాయాలయ్యాయి. తలకు బలంగా దెబ్బతగలడంతో అక్కడికక్కడే మృతి చెందాడు. స్థానికుల సమాచారంతో ఘటనాస్థలికి చేరుకున్న పోలీసులు కేసు నమోదు చేసి కుటుంబ సభ్యులకు సమాచారం ఇచ్చారు. మృతదేహాన్ని పోస్టుమార్టం కోసం ఆసుపత్రికి తరలించారు. శ్రీనివాస్ మృతి చెందడంతో వారి కుటుంబం కన్నీరుమున్నీరుగా విలపిస్తోంది.