హైదరాబాద్, నవంబర్ 21 (విజయక్రాంతి): ఇంజినీరింగ్, ఫార్మసీ సహా వివిధ వృత్తి విద్యా కోర్సుల్లో ప్రవేశాలకు నిర్వహించే ఉమ్మడి ప్రవేశ పరీక్షల (సెట్స్) షెడ్యూల్‌పై తెలంగాణ ఉన్నత విద్యామండలి కసరత్తు ప్రారంభించింది. ఈమేరకు సంబంధిత అధికారులు, టీసీఎస్ ప్రతినిధులతో తెలంగాణ ఉన్నత విద్యామండలి చైర్మన్ బాలకిష్టారెడ్డి గురువారం సమావేశమయ్యారు.

ఈ సందర్భంగా సెట్స్ షెడ్యూల్ రూపకల్పన, నూతన కన్వీనర్ల నియామకం, అకాడమిక్ క్యాలెండర్‌లో మార్పులు తదితర అంశాలపై చర్చించారు. జేఈఈ మెయిన్, నీట్, ఉద్యోగ నియామక పరీక్షల తేదీలను పరిగణలోకి తీసుకొని టీజీ ఎప్‌సెట్, ఐసెట్, లాసెట్ వంటి ప్రవేశ పరీక్షల తేదీలను ఖరారు చేయనున్నారు. వచ్చే విద్యాసంవత్సరాన్ని నెల రోజులు ముందుకు జరుపుతూ.. అన్ని యూనివర్సిటీలు ఒకేసారి అడ్మిషన్లు చేపట్టేలా కసరత్తు చేస్తున్నారు.