మదర్ సెంటిమెంట్, హార్రర్, యాక్షన్ కథతో తెరకెక్కనున్న చిత్రం ‘ఎర్రచీర : ది బిగినింగ్’. ఈ సినిమాలో నటుడు రాజేంద్రప్రసాద్ మనవరాలు బేబీ సాయి తేజస్విని నటిస్తోంది. సుమన్‌బాబు స్వీయ దర్శకత్వం వహిస్తూ ఒక ముఖ్య పాత్ర పోషించారు. శ్రీరామ్, కమల్ కామరాజు, కారుణ్య చౌదరి, అయ్యప్ప పీ శర్మ, సురేశ్ కొండేటి, రఘుబాబు మిగతా పాత్రల్లో నటించారు.

ఎన్‌వీవీ సుబ్బారెడ్డి, సీహెచ్ వెంకట సుమన్ ఈ చిత్రానికి నిర్మాతలు. డిసెంబర్ 20న తెలుగు, తమిళ, మలయాళ, కన్నడ భాషల్లో థియేటర్ల ద్వారా ప్రేక్షకుల ముందుకు రానుందీ చిత్రం. ఈ నేపథ్యంలో మూవీ గ్లింప్స్ రిలీజ్ ఈవెంట్‌ను హైదరాబాద్‌లో మంగళవారం నిర్వహించారు.

ఈ కార్యక్రమంలో దర్శక నిర్మాత తమ్మారెడ్డి భరద్వాజ మాట్లాడుతూ.. ‘హారర్, దేవుడు కాన్సెప్ట్‌తో సినిమా చేయడం ఈ మధ్య ట్రెండ్‌గా మారింది. ఈ సినిమా ఆ ట్రెండ్‌లోనే వస్తున్నప్పటికీ ఇంకా భిన్నంగా రూపొందించారు. బేబి సాయి తేజస్విని ముఖ్యపాత్రలో నటించింది. ఇండస్ట్రీకి కొత్త వాళ్లు రావాలి. అప్పుడే ప్రేక్షకులకు కొత్త టాలెంట్ దొరుకుతుంది’ అన్నారు.

చిత్ర దర్శకనిర్మాత, నటుడు సుమన్‌బాబు మాట్లాడుతూ.. ‘సినిమాలోని 22 పాత్రలతోపాటు ఎర్రచీర కూడా 23వ పాత్ర పోషిస్తుంది. సీక్వెల్ కూడా ప్లాన్ చేస్తున్నాం’ అని తెలిపారు. ‘సినిమాలో మదర్ సెంటిమెంట్ చూసి అందరూ కన్నీళ్లు పెట్టుకుంటారు’ అని హీరోయిన్ కారుణ్య చౌదరి అన్నారు.

నిర్మాత అంబికా కృష్ణ మాట్లాడుతూ.. ‘ప్రస్తుత ట్రెండ్ ప్రకారం ప్రేక్షకులకు కావాల్సిన కంటెంట్ ఉన్న చిత్రమిది’ అని చెప్పారు. నిర్మాత, నటుడు సురేశ్ కొండేటి మాట్లాడుతూ.. -‘ప్రేక్షకులకు కావాల్సిన ఎలిమెంట్స్ అన్నీ కలిపి సుమన్‌బాబు ఈ సినిమా రూపొందించారు’ అని తెలిపారు. చిత్రబృందం అంతా ఈ కార్యక్రమంలో పాల్గొన్నారు.