సీపీఆర్ చేసి ప్రాణాలు కాపాడిన అంబులెన్స్ సిబ్బంది

పెద్దపల్లి (విజయక్రాంతి) : విద్యుదాఘాతానికి గురై కొనఊపిరితో కొట్టుమిట్టాడుతున్న రైతుకు 108 సిబ్బంది సీపీఆర్ చేసి ప్రాణాలు కాపాడిన ఘటన పెద్దపల్లి జిల్లా ధర్మారం మండలంలో సోమవారం చోటుచేసుకున్నది. వివరాలిలా.. మల్లాపూర్‌కు చెందిన రైతు కొడిపెల్లి సందీప్ (28) ఆదివారం అర్ధరాత్రి ఐకేపీ సెంటర్ వద్ద వడ్లు పట్టడానికి కరెంటు వైరును సరిచేస్తుండగా విద్యుదాఘాతానికి గురయ్యాడు.

అక్కడే ఉన్న వారు 108కు సమాచారం ఇవ్వగా సిబ్బంది అక్కడికి చేరుకున్నారు. అప్పటికే సందీప్ అపస్మారక స్థితిలోకి వెళ్లగా 108 సిబ్బంది వాహనంలో ఆసుపత్రికి తరలిస్తూనే.. డాక్టర్ సలహా మేరకు సీపీఆర్ చేయడంతో స్పృహలోకి వచ్చాడు. యువ రైతు ప్రాణాలను కాపాడిన 108 సిబ్బంది ఆరె సతీష్, ఈఎంటీ నర్సింగం, పైలెట్‌ను సదరు రైతు కుటుంబ సభ్యులు, వైద్యులు అభినందించారు.