జడ్చర్ల (విజయక్రాంతి): జడ్చర్ల మున్సిపాలిటీ నూతన చైర్ పర్సన్ గా 14వ వార్డు కౌన్సిలర్ కోనేటి పుష్పలత ఎన్నికయ్యారు. సోమవారం జడ్చర్ల మున్సిపాలిటీ కార్యాలయములో మహబూబ్ నగర్ ఆర్డివో నవీన్ కుమార్ సమక్షంలో ఏకగ్రీవంగా ఎన్నికయ్యారు. మొత్తం 27 సభ్యులకు గాను బీఆర్ఎస్ పార్టీకి చెందిన 23మంది, కాంగ్రెస్, బీజేపీ పార్టీలకు చెందిన ఇద్దరు చొప్పున ఉండగా బీఆర్ఎస్ పార్టీకి చెందిన 14వ వార్డ్ కౌన్సిలర్ కోనేటి పుష్పలత ఒక్కరే నామినేషన్ వేశారు. చైర్ పర్సన్ ఎన్నికలో ఒక్కటే నామినేషన్ రావటంతో ఆమెను ఎన్నుకున్నట్లు ఎన్నికల అధికారి తెలిపారు. కోనేటి పుష్పలత ఎన్నిక కావటం పట్ల బీఆర్ఎస్ కార్యకర్తలు టపాసులు కాల్చి సంబురాలు చేసుకున్నారు.