హైదరాబాద్: తెలంగాణలోని రామగుండం సమీపంలో భూకంపం సంభవించే అవకాశం ఉందని భూకంప(Earthquake) పరిశోధన, విశ్లేషణ సంస్థ హెచ్చరిక జారీ చేసింది. వారి పరిశోధన ప్రకారం, రామగుండం పరిసరాల్లో ఒక పెద్ద భూకంపం సంభవించవచ్చు. దీని తీవ్రత హైదరాబాద్, వరంగల్ నుండి అమరావతి వరకు మహారాష్ట్రలోని కొన్ని ప్రాంతాలను ప్రభావితం చేసే అవకాశం ఉంది. అయితే, ఈ అంచనాను ప్రభుత్వం లేదా ఏ శాస్త్రీయ సంస్థలు ధృవీకరించలేదు. భూకంపాలను ముందుగానే అంచనా వేయడం సాధ్యం కాదని అధికారులు నొక్కి చెప్పారు.

తెలంగాణ, ఆంధ్రప్రదేశ్ పసిఫిక్ వర్గీకరణలోని భూకంప మండలాలు రెండు, మూడు కిందకు వస్తాయని నిపుణులు పేర్కొన్నారు. ఇక్కడ సాధారణంగా తక్కువ నుండి మితమైన తీవ్రత కలిగిన భూకంపాలు మాత్రమే సంభవిస్తాయని భావిస్తున్నారు. ఈ ప్రాంతంలో గతంలో భూకంపాలు సంభవించినప్పటికీ, వాటి వల్ల నష్టం జరగలేదు. ధృవీకరించని సమాచారం ఆధారంగా ప్రజలు ఆందోళన చెందాల్సిన అవసరం లేదని భారత వాతావరణ శాఖ (India Meteorological Department) అధికారులు పేర్కొన్నారు. 1969లో ప్రకాశం జిల్లాలోని ఒంగోలు ప్రాంతంలో 5.1 తీవ్రతతో భూకంపం సంభవించిందని, 1998లో తెలంగాణలోని ఆదిలాబాద్‌లో 4.5 తీవ్రతతో భూకంపం సంభవించిందని వారు గుర్తించారు. అదనంగా, 1984, 1999, 2013లో హైదరాబాద్‌లో స్వల్ప ప్రకంపనలు సంభవించాయి. భూకంప అంచనా శాస్త్రీయంగా సాధ్యం కాదని, అందువల్ల భయాందోళనలకు గురికావాల్సిన అవసరం లేదని నిపుణులు పునరుద్ఘాటించారు. అయితే, ప్రజలు జాగ్రత్తగా ఉండాలని ఎర్త్ కేక్ రీసెర్చ్ అండ్ అనాలసిస్ అధికారులు హెచ్చరించారు.