శేరిలింగంపల్లి,(విజయక్రాంతి): మద్యం మత్తులో ముందున్న స్కూటీని ఢీ కొట్టడమే కాకుండా స్నేహితులతో కలిసి  బాధితునిపైనే విచక్షణ రహితంగా దాడి చేసి ఓ వ్యక్తిని గాయపర్చారు కొందరు యువకులు. ఈ ఘటన గచ్చిబౌలి పోలీసు స్టేషన్ పరిధిలో సోమవారం అర్ధరాత్రి చోటుచేసుకుంది. స్థానికులు తెలిపిన వివరాల ప్రకారం... కొండాపూర్ ఏఎంబీ మాల్ వైపు నుండి మజీద్ బండ వైపు స్కూటీపై ప్రయాణిస్తున్న వ్యక్తిని మెర్సిడీస్ బెంజ్ కారు(టీఎస్07ఆర్ఆర్4455)లో వస్తున్న యువకులు ముందున్న స్కూటీని ఢీ కొట్టారు. దీంతో అతను పక్కనే ఉన్న ఫుట్ పాత్ పై  ఒక్కసారిగా ఎగిరి పడిపోయాడు. 

గాయపడి ఫుట్ పాత్ పై పడి ఉన్న బాధితుడి వద్దకు తిరిగి క్రెటా కారు (టీఎస్07ఈఎక్స్0079)లో తన స్నేహితులతో కలిసి వచ్చి మరోసారి బాధితుడిపై దాడికి తెగబడ్డారు. తన మెర్సిడీస్ బెంజ్ కారుకే డ్యామేజ్ చేస్తావా అంటూ బండ బూతులు తిడుతూ ఇష్టారీతిగా దాడికి పాల్పడ్డారు. ఈ సంఘటనను అక్కడే ఉన్నవారు వీడియో తీసి సోషల్ మీడియాలో పోస్ట్ చేయడంతో ప్రస్తుతం ఆ వీడియో వైరల్ గా మారింది. హైదరాబాద్ మహానగరంలో నడిరోడ్డుపై వ్యక్తిని కొడుతుంటే పోలీసులు పట్టించుకోలేదని, అసలు నగరంలో శాంతి భద్రతలు పూర్తిగా క్షీణించాయంటూ స్థానికులు ఆగ్రహం వ్యక్తం చేస్తున్నారు.